پەرلەمانتارێکی عێراق ڕایدەگەیەنێت" تۆمارنەکردنی داتای ئەو عێراقییانەی لە دەرەوەی وڵاتن، پێشێلکاریی یاسایە و بەپێی یاسا دەبێت لەڕێگەی دیپلۆماسەکانەوە زانیاریی و داتاکانیان وەربگیرێت".
ڕائید مالیکی، ئەندامی پەرلەمانی عێراق ڕایگەیاند" تۆمارنەکردنی زانیاریی و داتای ئەو عێراقییانەی لە دەرەوەی وڵات نیشتەجێن، پێشێلکاریی ئاشکرای بڕگەکانی یاسای ژمارە ٣٢ی ساڵی ٢٠٢٣یە، لەبارەی زانیاریی پەیوەست بە سەرژمێریی و ئاماری دانیشتوان".
وتیشی" بەپێی یاساکە دەبێت ئەو هاوڵاتییە عێراقییانەی لە دەرەوەی وڵات نیشتەجین، لەڕێگەی نوێنەرایەتییە دیپلۆماسییەکانی دەرەوە، زانیاریی و داتاکانیان بگیرێت".
قسەکانی ئەو پەرلەمانتارە لە کاتێکدایە، بە بونی بەڵگەنامە نیشتیمانییەکان ئەو کەسانەی لە دەرەوەی وڵات نیشتەجێن لەلایەن کەسوکاریانەوە لە سەرژمێریی گشتیی دانیشتواندا تۆمار دەکرێن.