وەزارەتی نەوت لە کاردانەوەیەکی تونددا بەرامبەر بەیاننامەکانی وەزارەتی سامانە سروشتییەکانی هەرێم ڕایگەیاند” ئەو جۆرە هەڵوێستانە سیاسی و حزبین و دوورن لە دیدگای پیشەیی و یاسایی بۆ کەرتی نەوت.”

وەزارەت جەختی کردەوە کە هەوڵەکانی بۆ چاککردنەوە و کارپێکردنەوەی بۆری نەوتی کەرکوک – جەیهان بەردەوامە و پلانی هەیە لە ڕێگەی وێستگەکانی سەرلو و فیشخابوورەوە ڕۆژانە بڕی ٢٥٠ هەزار بۆ ٤٥٠ هەزار بەرمیل نەوت هەناردە بکات، ئەمەش وەک هەنگاوێکی ستراتیژی بۆ کەمکردنەوەی کاریگەرییەکانی قەیرانی داخستنی گەرووی هورمز لەسەر ئابووری وڵات دەبینێت.

لە لایەکی ترەوە وەزارەت ئاماژەی بەوە کرد، بەپێی ڕێککەوتننامەی نێودەوڵەتی و یاسایی، بۆری گواستنەوەی نەوت دامەزراوەیەکی فیدراڵییە و تەنها حکومەتی ناوەند مافی ئیدارەدان و بڕیاردانی هەیە لەسەر هەناردەکردنی نەوت تا ئەوپەڕی توانای بۆرییەکە. 

هەروەها، نیگەرانی خۆی دەربڕی کە حکومەتی هەرێم پرسی هەناردەکردنی نەوتی بەستووەتەوە بە بابەتی مووچەی فەرمانبەرانەوە، لە کاتێکدا بەغدا سیستەمی "ئاسیکودا"ی وەک ئامرازێکی چاکسازی و بەرەنگاربوونەوەی گەندەڵی و ڕێکخستنی دارایی پێشنیار کردووە و پێویستە پرسی دارایی لە ململانێ نەوتییەکان جیا بکرێتەوە.

سەبارەت بە لایەنی دەستووری، وەزارەتی نەوت حکومەتی هەولێری تۆمەتبار کرد بە پێشێلکردنی ماددەکانی ١١٠ و ١١١ و ١١٢ی دەستوور کە دەڵێن نەوت و گاز موڵکی هەموو گەلی عێراقە و داڕشتنی سیاسەتی دارایی لە دەسەڵاتی حکومەتی فیدراڵییە. 

وەزارەتی نەوت جەختی کردەوە کە ڕێگریکردن لە هەناردەکردنی نەوت لەم بارودۆخە هەستیارەدا مەترسییەکی گەورە بۆ سەر بەرژەوەندییە باڵاکانی عێراق و ناوبانگی نێودەوڵەتی وڵات دروست دەکات، هەربۆیە هەڕەشەی گرتنەبەری هەموو ڕێوشوێنێکی یاسایی دەکات ئەگەر هەرێم لە بڕیارەکانی پاشەکشە نەکات.

لە کۆتایی بەیاننامەکەدا وەزارەتی نەوت داوای لە ئەنجوومەنی نوێنەرانی عێراق کرد کە وەک نوێنەری هەموو پێکهاتەکان بەدواداچوونی جدی بۆ ئەم دۆخە نائاساییە بکەن. وەزارەت داوای لە پەرلەمانتاران کرد کە بەرژەوەندی گشتی و واقیعی ئابووری وڵات بخەنە سەروو مانۆڕە سیاسییەکانەوە، چونکە فشارە ئابوورییەکانی ئێستا ڕێگە بە هیچ جۆرە دواکەوتنێک نادەن لە پاراستنی سەروەت و سامانی نیشتمانی و دابینکردنی بژێوی خەڵک لە هەموو پارێزگاکاندا.