سه‌رۆك وه‌زیرانی عێراق سه‌باره‌ت به‌ رێكاره‌كانی وردبینی له‌ گرێبه‌سته‌ حكومییه‌كان کۆبوونەوەیەکی تایبەتی لەگەڵ سه‌رۆكی دیوانی چاودێری دارایی فیدراڵ، سه‌رۆكی ده‌سته‌ی ده‌ستپاكی، سه‌رۆكی داواكاری گشتی و دادوه‌ری دادگای لێكۆڵینه‌وه‌ی كه‌رخ سازکرد.

له‌و كۆبوونه‌وه‌یه‌دا عه‌لی زه‌یدی فه‌رمانیدا به پێكهێنانی ‌"ئه‌نجومه‌نی باڵای سیادی بۆ ده‌ستپاكی و چاودێری و گه‌ڕاندنه‌وه‌ی دارایی گشتی"، ئه‌نجومه‌نێك كه‌ سه‌رۆك وه‌زیران خۆی سه‌رۆكایه‌تی ده‌كات و هه‌ریه‌كه‌ له‌ سه‌رۆكی دیوانی چاودێری دارایی و سه‌رۆكی ده‌سته‌ی ده‌ستپاكی ئه‌ندامێتی ده‌كه‌ن.

ئه‌ركی ئه‌م ئه‌نجومه‌نه‌ چاودێریكردنی وه‌زاره‌ت و لایه‌نه‌ نه‌به‌ستراوه‌كان به‌ وه‌زاره‌ت و پارێزگاكانده‌بێت، سه‌باره‌ت به‌ بابه‌ته‌ جه‌وهه‌رییه‌كان و راگرتنی به‌هه‌ده‌ردانی دارایی گشتی و گه‌ڕاندنه‌وه‌ی پاره‌كانی ده‌وڵه‌ت، به‌جۆرێك‌ ئه‌نجومه‌نه‌كه‌ ئه‌نجامی كاره‌كانی ره‌وانه‌ی دادگا بكات.

سه‌رۆك وه‌زیران هه‌روه‌ها فه‌رمانیداوه‌ لێكۆڵینه‌وه‌ بكرێت له‌ كه‌ڵكی ئابوری پرۆژه‌كان و لیژنه‌ی لاوه‌كی پسپۆڕ هه‌بێت بۆ وردبینی له‌ گرێبه‌سته‌كانی حكومه‌ت، ئه‌مه‌ له‌پێناو زامنكردنی به‌راوردكردنیان به‌ یاساو رێنماییه‌ كارپێكراوه‌كان.

له‌م كۆبونه‌وه‌یه‌دا گفتوگۆ كراوه‌ سه‌باره‌ت به‌ پێكهێنانی لیژنه‌یه‌كی ناوه‌ندی له‌نێوان دیوانی چاودێری دارایی و ده‌سته‌ی ده‌ستپاكی و وه‌زاره‌تی دارایی، كه‌ ئه‌ركی دانانی میكانیزمی وردبینی و لێكۆڵینه‌وه‌ بێت له‌ گرێبه‌سته‌ حكومییه‌كان به‌ر له‌ ئیمزاكردنیان، ئه‌مه‌ بۆ دڵنیابوون له‌وه‌ی هاوتای ته‌رخانكراوه‌كانن.