محەمەد حەکیم، وتەبێژی کۆمەڵی دادگەریی کوردستان، لە پەیامێکدا لەژێر ناونیشانی "وانەیەک بۆ دەنگدەران"، کاردانەوەی خۆی بەرامبەر بە هەڵمەتی دەستگیرکردنی بەرپرس و پەرلەمانتارەکانی ئەم دواییەی عێراق نیشاندا و ڕایگەیاند کە ئەو دیمەنانە پەیامێکی ڕوونن بۆ ئەوەی گەل بزانێت چۆن چەواشە کراوە.
وتەبێژەکەی کۆمەڵ ئاماژەی بەوە کردووە، زۆربەی ئەو دەستگیرکراوانە پەرلەمانتار بوون کە لەسەر شاشەی تەلەفزیۆنەکانەوە بە قسەی باقوبریق و دروشمی بریقەدار باسی گەندەڵی دەسەڵاتیان دەکرد و خۆیان وەک داکۆکیکاری سەرسەختی مافەکانی خەڵک و پێکهاتەکانی سوننە و شیعە نمایش دەکرد، کەچی لە ڕاستیدا تەنها خەریکی هەڵخەڵەتاندنی میللەت بوون بۆ بەرژەوەندیی خۆیان. جەختیشی کردەوە کە خەڵکی عێراق و هەرێمی کوردستان دەبێت بزانن؛ ئەگەر دەسەڵات خوێنیان بمژێت، ئەوا زۆرێک لەوانەی دەرەوەی دەسەڵاتیش یاری بە عەقڵیان دەکەن.
محەمەد حەکیم لە چوارچێوەی پەیامەکەیدا سێ ڕاستی تری لەبارەی ئەم هەڵمەتەوە خستووەتەڕوو:
یەکەم: ئەگەر ئەمڕۆش نەبێت، سبەی هەر دەبێت گەندەڵکارانی کوردستانیش ڕووبەڕووی یاسا ببنەوە و بە سزای خۆیان بگەن.
دووەم: مەرج نییە ئەو لایەنانەی کە فەرمانی دەستگیرکردنەکان دەردەکەن، خۆیان لە گەندەڵی پاک و بێگەرد بن.
سێیەم: ئەم هەڵمەتانە تەنها ماسییە بچووکەکان دەگرن و بە هیچ شێوەیەک دەست بۆ دزە گەورەکان و سەرکردە سەرەکییەکانی پشت پەردە نابەن.