مونیر حەداد، ڕاوێژکاری یاسایی سەرۆک وەزیرانی عێراق ڕایگەیاند'' ناوی ٢٨٢ تۆمەتبار بە دۆسیەکانی گەندەڵی کە لە ئێستادا لە دەرەوەی وڵات نیشتەجێن، خراونەتە لیستی ڕاوەدوونانی نێودەوڵەتی (ئینتەرپول) بە مەبەستی دەستگیرکردن و ڕادەستکردنەوەیان بۆ عێراق.''
حەداد ئاماژەی بەوە کردووە کە ئەم لیستە فەرمییە ناوی چەندین وەزیر، پەرلەمانتاری پێشوو و بازرگانی گەورەی تێدایە کە بە شێوەیەکی ڕاستەوخۆ تێوەگلاون لە دۆسیەکانی دزینی سامانی گشتی و دەوڵەمەندبوونی نایاسایی لەسەر حسابی دەوڵەت.
ڕاوێژکارەکەی سەرۆک وەزیران جەختیشی کردەوە کە ئامانجی سەرەکیی حکومەت لەم هەنگاوە یاساییە نێودەوڵەتییە، گەڕاندنەوەی ئەو تۆمەتبارانە و دادگاییکردنیانە، هاوکات لەگەڵ گێڕانەوەی بڕی زیاتر لە تریلیۆنێک دیناری عێراقی بۆ خەزێنەی گشتیی دەوڵەت کە بە نایاسایی لە وڵات براوەتە دەرەوە.