"جگه‌ له‌ په‌رله‌مان ئه‌نجوومه‌نی پارێزگا و پارێزگاره‌كانیش له‌ عێراق شكستخواردوون"

‌

هادی عامری، سه‌رۆكی هاوپه‌یمانی فه‌تح، راگه‌یه‌ندراوێكی له‌ باره‌ی دۆخی عێراق بڵاوكرده‌وه‌ و دەڵێت" " جگه‌ له‌ په‌رله‌مان ئه‌نجوومه‌نی پارێزگا و پارێزگاره‌كانیش له‌ عێراق شكستخواردوون، بۆیه‌ به‌ پێویستى ده‌زانین ئه‌و ئه‌نجوومه‌نانه‌ هه‌ڵبوه‌شێنرێنه‌وه‌ و پارێزگار ڕاسته‌وخۆ له‌لایه‌ن گه‌له‌وه‌ هه‌ڵبژێردرێت".


عامری لە ڕاگەیەندراوەکەدا ئەوەشی خستەڕوو: سیسته‌می په‌رله‌مانی شكستی هێناوه‌ و چیتر سوودی نییه‌، بۆیه‌ ده‌بێت له‌ ڕێگه‌ی هه‌مواری دەستوورە‌وه‌ سیسمه‌كه‌ بگۆڕێت بۆ سیستمێك كه‌ له‌گه‌ڵ ڕه‌وشی ئێمه‌ بگونجێت.


هادی عامری جەختیشیکردەوە: ڕێز له‌و پێشنیاز و ده‌ستپێشخه‌رییانە‌ ده‌گرین كه‌ بۆ چاره‌سه‌ری كێشه‌كان و جێبه‌جێكردنی داوای ڕه‌وای خۆپێشانده‌ران پێشكه‌ش كراون‌، به‌ڵام چاره‌سه‌ری ڕاسته‌قینه‌ له‌ ڕێگه‌ی گۆڕانكاری بنەڕەتیی له‌ژێر سایه‌ی ده‌ستوور و له‌ هه‌ندێك بڕگه‌ و مادده‌ی ده‌ستووردا ده‌بێت.


خۆپیشاندانه‌كانی عێراق له‌ سه‌ره‌تای مانگی ئۆكتۆبه‌ره‌وه‌ ده‌ستیان پێكرد، به‌ڵام له‌ ٢٥ی ئۆكتۆبه‌ره‌وه‌ ژماره‌ی خۆپیشانده‌ران زیاتر بووه‌ و خۆپیشانده‌ران ئاماده‌نین گۆڕه‌پانه‌كان چۆڵ بكه‌ن و به‌ مه‌رجی گۆڕانكاری ریشه‌یی، ئاماده‌ن بچنه‌وه‌ ماڵه‌وه‌. 
 



AM:12:01:02/11/2019






ئەستێرەکان

Spee Media