بڕیارە مانگی داهاتوو لە شاری هەولێر، دیدارێك بۆ شاعیر و وەرگێڕی نێوداری کورد هەژار موكریانی بەڕێوەبچێت.
بەشی ڕۆشنبیری و ڕاگەیاندنی پارتی، له ڕاگهیهنراوێكدا بڵاویکردەوە" بۆ ڕێزگرتن لە ڕۆڵ، نەخش، خەبات و هزر و بەرهەمداری زانا، نووسەر، شاعیر و وەرگێڕی ناوداری کورد هەژار موکریانی، لە ڕێوڕەسمێکی شایستەی یەکڕۆژیدا دیداری هەژار موکریانی ساز دەکات".
ئاماژەی بەوەشکردووە، دیدارەکە هاوکاتە لەگەڵ ساڵوەگەڕی کۆچی دوایی هەژار موکریانی و ڕۆژی جیهانی زمانی دایک، لە ٢٢ی شوباتی ٢٠٢٥ لە هەولێر بەڕێوەدەچێت.
بەشی ڕۆشنبیری و ڕاگەیاندنی پارتی لە ڕاگەیەندراوەکەدا ئەوەشی خستەڕوو، دیداری یەکەمی هەژار موکریانی تایبەت دەبێت بە زمانی کوردی و هەوڵ دەدات پرسی زمان بکاتە پرسی هەموو کوردەواری و لە ڕێگەی چەند پانێڵێکی جیاوازەوە ئەم پرسە هەستیار، ژیانی و ژیارییە تاوتوێ بكات.
عەبدولڕەحمان محەمەد شەڕەفکەندی ناسراو بە هەژار موکریانی مانگی نیسانی ١٩٢١ لە شاری مەهاباد ڕۆژهەڵاتی کوردستان لە خانەوادەیەکی ڕۆشنبیر و کوردپەروەر لەدایکبووە، هەژار برای سادق شەڕەفکەندی سکرتێری گشتی حیزبی دیموکراتی کوردستانی ئێران بووە.
سەرەتا لای باوکی و دواتر لە حوجرە خوێندوویەتی، ساڵی ١٩٤٠ دەستی بە نووسین کردووە، ڕۆڵێکی چالاکی لە کۆماری مەهاباددا ھەبووە و لەگەڵ ھێمنی شاعیردا لەلایەن کۆمارەوە بە (ھۆنراوەی نەتەوەیی کوردستان) ناسێنران.
لە ساڵی ١٩٧٢دا، کتێبی (شەرەفنامەی شەرەفخان)ی بەدلیسی لە فارسییەوە کرد بە کوردی، هەروەها (فەرهەنگی هەنبانەبۆرینە)ی ئامادە کردووە و یەکەم چاپی لە ساڵی ١٩٩٠دا بڵاوکراوەتەوە، خاوەنی کۆمەڵێک بەرهەمی تریشە، هەروەها شارەزای کاروباری هەموو پارچەکانی کوردستان بووە.
هەژار موکریانی لە ساڵی ١٩٩١دا کۆچی دوایی کرد و لە شاری مەهاباد بە خاک سپێردرا.