لە چوارچێوەی هێزەکانی هاوپەیمانی دژی داعش، ئوسترالیا بڕیاریدا هێزەکانی لە عێراق بکشێنێتەوەو کۆتایی بە ئەرکە سەربازی و راوێژکارییەکانی بهێنێت.
حکومەتی ئوسترالیا لە راگەیاندنراوێکدا ئاشکرای کرد " دوای ئەوەی کە مەترسییەکانی داعش کەمبوونەتەوە لە عێراق بریاریانداوە هێزەکانیان کە لەنێو چوارچێوەی هاوپەیمانێتی نێودەوڵەتیدا کاردەکەن، بکشێنێـتەوە و کۆتایی بە ئەرکەکانی خۆی بهێنێت."
بەپێی راگەیاندراوەکەی ئەو وڵاتە" هێزەسەربازی و راهێنەرەکانی ئوسترالیا لە ساڵی ٢٠١٤ـەوە کە هاتوونەتە عێراق راهێنانیان بە ٤٧ هەزار سەربازی عێراقی کردووە".
هەروەها ئاماژە بەوەش دەکەن کلە ٢٧ هەزار هێرشی ئاسمانییان کردووەتە سەر پێگە و مۆڵگەکانی داعش لە عێراق و سوریا و ٥٥٠ چالاکی هەواڵگریی ئاسمانییان ئەنجامداوە.
وەزارەتی بەرگریی ئوسترالیاش رایگەیاندووە، کاری ئێمە لە عێراق تەواو بووە و لەم مانگەدا کۆتایی بە ئەرکەکانمان دەهێنێن.