کەناڵی سی ئێن ئێن لە زاری سەرچاوەیەکی دیپلۆماسییەوە ڕایگەیاند کە شاندی دانوستانکاری قەتەر دوای ڕاوێژکردن لەگەڵ ئەمریکا، بەرەو تاران بەڕێکەوتوون بۆ ئەوەی لەگەڵ بەرپرسانی کۆماری ئیسلامی لێکتێگەیشتنە پێشبینیکراوەکەی نێوان تاران و واشنتۆن بکەن رێکەوتنەکە یەکلایی بکەنەوە.

ئەم سەردانە لە چوارچێوەی بەردەوامی هاتوچۆ دیپلۆماسییەکانی قەتەردا دێت. چوارشەممەی ڕابردووش، دانوستانکارانی قەتەری دوای ڕاوێژکردن لەگەڵ لایەنی ئەمریکی چوونە تاران و لەگەڵ بەرپرسانی کۆماری ئیسلامی تاوتوێی دەقی پێشبینیکراوی لێکتێگەیشتنەکەیان کرد.

جووڵەی نوێی قەتەر لە کاتێکدایە کە دۆناڵد ترەمپ، سەرۆکی ئەمریکا ڕایگەیاندووە کە بڕیارە ڕێکەوتنەکە لەگەڵ کۆماری ئیسلامی ئەمڕۆ، یەکشەممە، واژۆ بکرێت و دوای ئەوە گەرووی هورمز بەڕووی هەموو وڵاتاندا دەکرێتەوە.

عەباس عێراقچی، وەزیری دەرەوەی کۆماری ئیسلامی ڕایگەیاندووە، ئەگەر قۆناغی کۆتایی گفتوگۆکان ئەنجام بدرێت، لێکتێگەیشتنەکە دەکرێت لە دوورەوە واژۆ بکرێت و پاشان ڕابگەیەنرێت.

پێشتر ماڵپەڕی ئەکسیۆس نووسیبووی کە ئەمریکا، کۆماری ئیسلامی و نێوەندگیرە پاکستانی و قەتەرییەکان خۆیان بۆ واژۆکردنی ئەلیکترۆنیی یادداشتی لێکتێگەیشتنەکە لە ڕێگەی کۆبوونەوەیەکی ئۆنلاینەوە ئامادە دەکەن.

پاکستانیش ڕایگەیاندووە کە ئیسلام ئاباد خۆی بۆ سازدانی ڕێوڕەسمی واژۆکردنی ئەلیکترۆنیی یادداشتی لێکتێگەیشتنەکەی نێوان کۆماری ئیسلامی و ئەمریکا ئامادە دەکات.