توێژینەوەیەكی نوێ كە لەحەوت زانكۆی جیهانیی ئەنجام دراوە، ئاشكرایدەكات كە ئەو منداڵانەی لەبنەماڵە ئایینیەكاندا گەورە دەبن "نا میهرەبان"ترن لەو منداڵانەی لە خێزانە بێ ئایینەكان گەورە دەبن. ئەوان هەروەها حەزیان "لە سزادان‌و تەمێكردنی خەڵكی دیكە"هەیە.

بەپێی راپۆرتی رۆژنامەی گاردیەن، ئەمە ئەنجامی توێژینەوەیەكی نوێ لەسەر ئەخلاق‌و ئایینە كە لەلایەن حەوت زانكۆی بەناوبانگی جیهان لەسەر ژمارەیەك منداڵ ئەنجام دراوە كە لەخێزانە مەسیحی، موسڵمان‌و بێ ئایینەكاندا لەدایك بوون‌و گەورەبوون.

نوسەری ئەنجامی ئەم توێژینەوەیە، كە لە گۆڤاری (Current Biology) بڵاوكراوەتەوە دەنوسێت "بەگشتی ئەنجامی ئەم توێژینەوەیە بە پێچەوانەی بۆچوونی گشتییە، كە منداڵانی خێزانە ئاینیەكان بە بەراورد بە كەسانی دیكە مرۆڤ دۆست تر‌و  بەزییان زیاترە".

ئەم توێژینەوەیە لەسەر 1200 منداڵ لە تەمەنی 5 تا 12 ساڵ لە وڵاتانی ئەمەریكا، كەنەدا، چین، ئەردەن، توركیا‌و ئەفریقای باشور ئەنجام دراوە.

42%ی ئەم منداڵانە لە خێزانە مەسیحییەكان، 43% لە خێزانی موسڵمان‌و نزیكەی 28%یش لەو خێزانانە بوون كە هیچ ئایینێكیان نەبووە.

بە پێی ئەنجامی توێژینەوەكە "ئەو منداڵانەی لە خێزانە مەسیحی یان موسڵمانەكان گەورە ببوون، كەمتر ئامادەبوون ئەو شتانەی كە هەیانە لەگەڵ كەسانی دیكە دابەشی بكەن، هەرچی تەمەنی ئەم منداڵانە زیاتر بوو (واتە ماوەیەكی زیاتر لەناو خێزانە ئایینەكان ژیابن) رێژەی مرۆڤ دۆستی ئەوان كەمتر دەبوو.

ئەم توێژینەوەیە هەروەها نیشانی دەدات كە منداڵانی خێزانە ئایینەكان حەزێكی زۆریان لە تەمێكردن‌و سزادانی باقی منداڵانی دیكە هەیە‌و زۆرتر داوەریی لەسەر كاری كەسانی دیكە دەكەن. منداڵانی موسڵمان زیاتر لە مەسیحی‌و هەردووی ئەمانەش زیاتر لە منداڵانی بێ ئایین، رێگە بە خۆیان داوە لەسەر هەڵسوكەوتی كەسانی دیكە داوەریی بكەن‌و لە ئەنجامدا سزایان بدەن.

ئەمەش لەكاتێكدایە كە باوانی منداڵانی مەزهەبی، پێیانوایە منداڵەكانیان لە منداڵانی دیكە بەسۆز بەزەیی ترن.