تورکیا بە سەختی سەنتەری گوندی مژێی بۆردومانکرد

‌
دوای چۆڵکردنی گوندێکی سنووری قەزای ئامێدی لەبەر ترسی هێرشەکانی دەوڵەتی تورکیا، ئێوارەی ئەمڕۆ یەکشەممە فڕۆکە جەنگییەکانی سوپای تورکیا بە سەختی سەنتەری گوندی مژێی لە بناری چیای گارە بۆردومانکرد. 

بەپێی زانیارییەکانی ماڵپەڕی (سپی)، شەش مانگ پێش ئێستا بەهۆی ترسی بۆردومان و تۆپبارانی دەوڵەتی تورکیا گوندی مژێ کە نزیکەی (٢٠) ماڵی تێدا نیشتەجێن لە بناری چیای گارە دانیشتوانی ئەو سنوورە گوندەکەیان چۆڵکردووە و ڕوویان لە شار و شاروچکەکانی ناوچەکە کردووە. 

ئێوارەی ئەمڕۆش لە لایەن فرۆکەکەنی سوپای تورکیاوە بە سەختی ماڵی هاوڵاتییانی گوندی مژێ لە بناری چیای گارە بۆردومانکران. 

گوندی مژێ دەکەوێتە چیای گارە لە سنووری قەزای ئامێدی کە ڕۆژانە لە لایەن تۆپخانەکانی سوپای تورکیاوە ئەو ناوچەیە بۆردومان دەکرێت. 

هاوکات هەفتەی ڕابردوو بۆ ماوەی شەش ڕۆژ ئاگر لە سنووری گوندی (مژێ و سپێنداری و گرگاش و دێرەشێ و کەڤنەمژێ) کەوتەوە کە پێنج گوندی ئەو سنوورەن، لە ئەنجامی بۆردومانەکانی تورکیاش بە سەدان دۆنم سووتاون و هەزاران داری سروشتیش لەو دەڤەرە سووتاون و زیانێکی زۆری پێگەیشتووە. 

وێنە و ڤیدیۆی ساتی بۆردومانەکەی تورکیا لە گوندی مژێ لەم لینکەوە ببینە



PM:08:34:14/07/2024






ئەستێرەکان

Spee Media