دوای بڵاوبوونەوەی دەنگۆکان سەبارەت بە ڕووداوێکی نێوان میرخاس دۆسکی، یاریزانی هەڵبژاردەی عێراق و یونس مەحموود، سەرۆکی یەکێتیی تۆپی پێی عێراق، یاریزانەکە بە فەرمی ڕوونکردنەوەی دا و ئەو دەنگۆیانەی ڕەتکردەوە.
میرخاس دۆسکی لە لێدوانێکدا ڕایگەیاند: "من یونس مەحموودم خۆش دەوێت و ڕێزێکی زۆرم بۆی هەیە، بە هیچ شێوەیەک ناکرێت ڕەفتارێکی نەگونجاو بەرامبەر بە هیچ کەسێک بکەم، ئەو بۆ من وەک برایەکی گەورە وایە."
سەبارەت بە وردەکاریی ڕووداوەکە، دۆسکی ڕوونیکردەوە: "ئەوەی ڕوویدا پەیوەندی بە بارودۆخی تەندروستیی منەوە هەبوو، لەناو پاسەکەدا تووشی ئازاری توندی سک و ڕشانەوە بووم. کاتێک گەیشتینە هۆتێلەکە، باری تەندروستیم خراپتر بوو، بۆیە تەنها بیرم لەوە دەکردەوە بە خێرایی بگەیمە ژوورەکەم و سەردانی پزیشکی یاوەری تیمەکە بکەم."
لە کۆتاییدا یاریزانەکە ئاماژەی بەوەدا کە پەیوەندییان ئاساییە و وتی: "بە پێچەوانەی ئەوەی باس دەکرێت، دوای ڕووداوەکە کاپتن یونس بەخۆی هات و هەواڵی تەندروستیمی پرسی و هیوای زوو چاکبوونەوەی بۆ خواستم، ئێستا تەندروستیم زۆر باشە و هەموو هەوڵێکمان بۆ ئەوەیە لە ئاست چاوەڕوانیی گەلی عێراقدا بین و لە مۆندیالدا دڵخۆشیان بکەین."