سەرچاوە: میدیاکانی فەرەنسا
لە میانەی ئامادەکارییەکانی هەڵبژاردەی فەرەنسا بۆ ڕووبەڕووبوونەوەی عێراق لە جامی جیهانی 2026، دیدێ دێشامپی ڕاهێنەری "کەڵەشێرەکان" لە وتارێکی توند و هۆشیارکەرەوەدا لە ژووری جلگۆڕین، داوای لە یاریزانەکانی کرد بە هیچ شێوەیەک بە کەم سەیرکردنی هەڵبژاردەی عێراق نەکەون.
دێشامپ لە پەیامەکەیدا بۆ یاریزانەکانی وتی: "وا مەزانن عێراق تیپێکی لاوازن، چونکە بە هیچ شێوەیەک وانین. بۆ ئەوەی بە ووردی لە ئاستیان تێبگەن، با چەند نموونەیەکی واقییتان بۆ باس بکەم".
ڕاهێنەرەکەی فەرەنسا ئاماژەی بە ئاستە بەرزەکانی عێراق دا و وتی: "عێراق لە مەکسیک بە ئەنجامی 2-1 لە هەڵبژاردەی بەهێزی بۆلیڤیای بردەوە، هەروەها لە یارییەکی دۆستانەدا توانییان بەرامبەر ئیسپانیا ڕاگرن. لە یەکەم یارییشیان لە جامی جیهانی بەرامبەر نەرویج، تا خولەکی 75 ئەنجامەکە 2-1 بوو، پێش ئەوەی لە کۆتاییەکاندا بەهۆی ماندوێتییەوە دوو گۆڵیان لێ بکرێت".
دێشامپ هۆشداری ئەوەی دا کە بە ناوبانگی فەرەنسا یارییەکان یەکلایی نابنەوە: "نامەوێت کەس وا بیر بکاتەوە ئەرکەکە ئاسانە تەنها لەبەر ئەوەی ئێمە فەرەنسین. تیپی گەورەی تریش تووشی هەمان هەڵە بوون و باجی قورسیان دا، نامەوێت ئێمەش بکەوینە هەمان هەڵەوە".
سەبارەت بە شێوازی یارییکردنی عێراقیش، دێشامپ وتی: "عێراق تیپێکی رێکخراوە، شتە سادەکان بە نایابی جێبەجێ دەکەن. ئەوان بە شێوازی 4-4-2 یاری دەکەن، خاوەنی یاریزانی خاوەن کوالێتی هونەری باشن، شێوازی یارییکردنیان روون و لۆژیکییە و خاڵی بەهێزیان ئەوەیە کە هەمیشە کاردانەوەیان هەیە".
لە کۆتاییدا دێشامپ جەختی لەوە کردەوە کە پێویستە یاریزانەکانی لە ماوەی 3 رۆژی داهاتوودا بە تەواوی ئامادەبن و بە تەزکیەی خۆیان نەچنە نێو یاریگاوە.