پیرلویجی کۆلینا، سەرۆکی لیژنەی ناوبژیوانانی فیفا، بە توندی وەڵامی ئەو ڕەخنە و تۆمەتانەی دایەوە کە حیسام حەسەن راهێنەری میسر سەبارەت بە دادوەری لە مۆندیال ئاڕاستەی کردبوو.
کۆلینا لە کۆنگرەیەکی ڕۆژنامەوانیدا ڕایگەیاند: "کەس ناتوانێت بانگەشەی ئەوە بکات کە ناوبژیوانی لە فیفا لەلایەن هیچ لایەنێکەوە کاریگەری لەسەر دەبێت. ئەم تۆمەتانە بێ بنەمان و هیچ جێگەیەکیان لە وەرزشەکەماندا نییە، هەروەها ڕێگە نادەین کەس گومان لە بێگەردی و پاکی ناوبژیوانانی مۆندیال بکات."
شیکردنەوەی بڕیارەکان لە یاری میسر و ئەرجەنتین
سەرۆکی لیژنەی ناوبژیوانان تیشکی خستە سەر هەندێک حاڵەتی ناوبژیوانی لە یاری نێوان میسر و ئەرجەنتین و وتی: "دوای هەر گۆڵێک، ناوبژیوانانی ڤار تەواوی قۆناغی دروستکردنی هێرشەکە تاوتوێ دەکەن. ئەگەر هەڵەیەک دیاری بکرێت کە کاریگەری لەسەر گۆڵەکە هەبووبێت، ڤار داوا لە ناوبژیوان دەکات سەیری شاشەکە بکات، هیچ سنوورێکی کات و مەوداش بۆ گەڕانەوە بۆ ئەو هەڵەیە نییە."
کۆلینا زیاتر ڕوونی کردەوە: "نموونەی ئەوەش لە یاری میسر و ئەرجەنتین ڕوویدا، کاتێک مروان عەتیە (یاریزانی میسر) بە ئاشکرا پێی خستە سەر پێی لیساندرۆ مارتینێز (یاریزانی ئەرجەنتین)، ئەوە بە دیاریکراوی هەڵەیە. بەڵام لە حاڵەتەکەی محەمەد سەڵاح و خولیان ئەلڤارێز، بەرگریکارەکە سەرەتا دەستی بۆ تۆپەکە برد و دواتر بەریەککەوتنێکی سروشتی ڕوویدا، بۆیە ناوبژیوان و ڤار بڕیاریان دا یارییەکە بەردەوام بێت."
سەبارەت بە ئاستی گشتی دادوەری لە مۆندیالدا، کۆلینا ئاماژەی بەوە کرد کە تا ئێستا 96 یاری بەڕێوەچووە، کە دەکاتە ڕێژەی 50% زیادبوون بەراورد بە مۆندیالی 2022ی قەتەر، و تەنها 8 یاری گەورە ماون.
کۆلینا لە کۆتاییدا جەختی کردەوە: "گفتوگۆی بونیادنەرانە لەسەر بڕیارەکان هەمیشە بەشێک دەبێت لە تۆپی پێ، بەڵام تۆمەتی ناڕاست جێگەی قبوڵکردن نییە. ئەم جۆرە قسانە مەترسی بۆ سەر ژیانی ناوبژیوانان و خێزانەکانیان دروست دەکات. هەروەها دڵنیاتان دەکەمەوە کە لیژنەکەمان بە تەواوی سەربەخۆیە و تەنانەت جیانی ئینفانتینۆ، سەرۆکی فیفاش، دەستوەردان لە بڕیارەکان ناکات و تەنها متمانە و پشتیوانیمان بۆ دابین دەکات."