پۆلیسی سلێمانی ئاشکرایکرد، هێزه‌كانی بنكه‌ی‌ پۆلیسی‌ سه‌را به‌ هاوكاری‌ به‌شی‌ پۆلیسی‌ ڕێكاریی، سێ تۆمه‌تبار یان ده‌ستگیركرد كه‌ سوكایه‌تییان به ‌مێردمنداڵێك كردبوو.

ئەمڕۆ یەکشەممە ١٩ی کانوونی یەکەم، بەڕێوەبەرایەتی پۆلیسی سلێمانی رایگەیاند " مه‌فره‌زه‌كانی‌ بنكه‌ی‌ پۆلیسی‌ سه‌را به‌هاوكاری‌ به‌شی‌ پۆلیسی‌ رێكاریی سێ تۆمه‌تباریان ده‌ستگیركرد كه‌ سوكایه‌تیان به ‌مێردمنداڵێك كردبوو و دواتر ڤیدیۆکەیان له‌ تۆڕه‌كۆمه‌ڵایه‌تییه‌كان بڵاوكردبوه‌وه‌".

هەرلەڕاگەیاندراوەکەدا ئەوەش هاتووە، پاش وه‌رگرتنی‌ بڕیاری‌ به‌ڕێز دادوه‌ر، توانرا له‌ماوه‌یه‌كی‌ كه‌مدا هه‌رسێ تۆمه‌تباره‌كه‌ له‌لایه‌ن مه‌فره‌زه‌كانی‌ بنكه‌ی‌ پۆلیسی‌ سه‌را به‌هاوكاری‌ به‌شی‌ پۆلیسی‌ رێكاریی بدۆزرێنه‌وه‌ و ده‌ستگیربكرێن.

پۆلیسی سلێمانی لەبارەی ناسنامەی ئەو تۆمەتبارانە ڕایگەیاند " له‌ئێستادا هه‌رسێ تۆمه‌تبار (ه، ر، س)، (ه، ئـ، ف)، (س، ص، ع) به‌بڕیاری‌ به‌ڕێز دادوه‌ر راگیراون‌ و لێكۆڵینه‌وه‌ له‌گه‌ڵیاندا به‌رده‌وامه‌".