هێزەکانی سوریای دیموکرات هەسەدە،  ئاماری شەهید و بریندارانی شەڕەکەی زیندانی غوێرانی حەسەکەی ئاشکراکرد‌ کە ١٧ شەڕڤان ‌و ئەندامی هێزەکانی ناوخۆ و خۆبەخشانی دەزگا خزمەتگوزارییەکان شەهید بوون.

لە ڕوونکردنەوەیەکی هەسەدە دا هاتووە، ‌ لەدوای هێرشە تیرۆریستییەکەی داعش بۆ سەر زیندانی حەسەکە شەڕڤانان بەرخۆدانێکی بێ وێنە یان دەستپێکردووە و لەکاتژمێرەکانی سەرەتاوە تا ئێستا ١٧ شەڕڤان‌ و هێزەکانی ئاسایشی ناوخۆ و خۆبەخشانی دەزگا خزمەتگوزارییەکان شەهیدبوون، شەڕڤانان ڕێگەیان بەپیلانی تیرۆریستی نەداوە کە حوکمی ئەو زیندانە بکەن ‌و تیرۆریستەکان برفێنن.

هەربەپێی ئەو ئامارەی هێزەکانی سوریای دیموکرات بڵاویانکردووەتەوە، هه‌ر لەکاتی ڕووبەڕوو بوونەوەکاندا ٢٣ کاسبکاری مەدەنیش زیانیان بەرکەوتووە و بریندار بوون.

ئەمەش لەکاتێکدایە لە دره‌نگانی شەودا  شانە نوستووەکانی داعش لەحەسەکە هه‌وڵی شكاندنی زیندانی غوێرانیاندا له‌شاری‌ حه‌سه‌كه‌ی‌ ڕۆژئاوای‌ كوردستان كه‌ نزیكه‌ی ٥ هه‌زار چه‌كداری‌ داعشی‌ تێدا زیندانیی كرابوو‌، هەندێک له‌زیندانییه‌كان توانیان ڕابکەن، بەڵام دواتر نزیكه‌ی ١٠٠ كه‌سیان له‌لایه‌ن شه‌ڕڤانانی هه‌سه‌ده ‌و هێزه‌ ئه‌منییه‌كانی رۆژئاواوه‌ ده‌ستگیركرانه‌وه‌ .