دادگالی فیدراڵی عێراق بەهۆی بەشداریكردنیان لە ریفراندۆم، بانگهێشتی چەند ئەندامێكی ئەنجومەنی پارێزگای كەركوكی كردووە.
كامەران كەركوكی، ئەندامی ئەنجومەنی پارێزگای كەركوك بەدەنگی ئەمریكای راگەیاندووە "لەم كاتەدا زیندووكردنەوەی دۆسیەی ریفراندۆم و بانكگردنی ئەندامانی ئەنجومەنی پارێزگاكە بێ هۆ نییە، جۆرێكە لە فشار و رەنگە ناوەكانیان بۆ دەزگا ئەمنیی و دبلۆماسییەكانی دەرەوە بووبێت."
ناوبراو ئاماژەی بەوەشكرد "دادگا تەنها داوای ناوی ئەندامانی ئەنجومەنی پارێزگای كەركوك دەكات، ئەمە بەبێ هۆكار نییە".
ئەنجومەنی پارێزگای كەركوك لە ٤١ ئەندام پێكهاتووە كە لە ئێستادا سڕكراوە و ئەو ئەندامانەی ئەنجومەنی پارێزگای كەركوك كە بانگێشتكراون ژمارەیان نزیكەی ٢٣ ئەندامە.
لە ١٥ی ئەیلولی ٢٠١٧ پەرلەمانی كوردستان، بە بەشداری هەریەكە لە فراكسیۆنەكانی پارتی، یەكێتی و یەكگرتوو و شیوعی و سۆشیالیست كۆبووەوە و بە دەنگی ٦٥ پەرلەمانتار كۆمسیۆنی باڵای هەڵبژاردنەكانی بۆ ئەنجامدانی ریفراندۆم راسپارد، كە لەهەرێمی كوردستان و سەرجەم ناوچە كوردستانیەكانی دەرەوەی ئیدارەی هەرێم راپرسی بۆ پرسی سەربەخۆیی ئەنجام بدات.