عەسائیبی ئەهلی حەق هۆشداری دەدات لە دەستوەردانی نەتەوەیەكگرتووەكان لە كێشەكانی نێوان هەرێم و بەغدا و دەڵێت، ئەو كارە بە مانای لەدەستدانی یەكڕیزی و سەربەخۆیی دەوڵەتی عێراق دێت.
مەحمود ڕوبێعی، وتەبێژی مەكتەب سیاسیی عەسایبی ئەهلی حەق لە ڕاگەیەنراوێكدا ڕایگەیاند، "دەستێوەردانی ئەنجومەنی ئاسایش لە كێشەكانی نێوان حكومەتی عێراق و حكومەتی هەرێمی كوردستان پێشینەیەكی مەترسیدارە و پێشێلكردنی هەموو یاساكانە."
ناوبراو ئاماژەی بەوەكردووە "ناردنی نێردەی نەتەوە یەكگرتووەكان بۆ دانوستان لە نێوان بەغدا و هەولێر بە واتای ناوبژیوانی نێودەوڵەتی دێت، لەكاتێكدا ئەو تەنها لەنێوان دوو وڵاتی سەربەخۆدا دەبێت ڕووبدات، نەك لەنێوخۆی وڵاتێكدا."
هەروەها وتویەتی "ئەو كارە بە واتای بە نێودەوڵەتیكردنی ناكۆكییەكان و كردنەوەی دەرگای دەستێوەردان بۆ وڵاتانی دیكە و لەدەستدانی یەكڕیزی و سەربەخۆیی دەوڵەتی عێراق دێت."
نێچیرڤان بارزانی سەرۆکی هەرێم پیشنیاری بۆ نەتەوەیەکگرتووەکان کردووە کە نوێنەرێک دابنێن بۆ چارەسەرکردنی کێشەکانی نێوان بەغدا و هەولێر.
لەماوەی رابردودا نێچیرڤان بارزانی سەرۆكی هەرێمی كوردستان داوای لە نەتەوەیەكگرتوەكان كرد ناوبژیوانی بۆ چارەسەری كێشەكانی نێوان هەولێر و بەغدا بكەن.