شارەزایەکی بواری
کەشناسی ڕایدەگەیەنێت " چلەی هاوین بەرەو كۆتایی دەڕوات و بارستە هەوایەكی فێنك
هەرێم دەگرێتەوە و ئەو گەرما پڕوكێنەرەی زیاتر لە هەفتەیەكە ناوچەكەی گرتۆتەوە كۆتایی
دێت".
ئاراس جەبار، شارەزای
كەشناسی ئاشکرایکرد، لە كاتەكانی سبەی یەك شەممە ٧ ی ئاب بەدواوە ناوچەكانمان دەكەوێتەوە
ژێر كاریگەری بارستە ھەوایەكی فێنك، كە بەسەر دەریای ناوەڕاستەوە دەگاتە ناوچەكە و
سەرەتا كاریگەری لەسەر ناوچەكانی ڕۆژئاوای ھەرێم ئەبێت بە نزمبوونەوەی پلەكانی گەرما
بەڕێژەی ٢ پلە و لەناوچەكانی دیكەی ھەرێمدا بەگشتی ١ پلە گەرما نزمدەبنەوە.
باسی لەوەشکردووە، ھەر لە ئەنجامی كاریگەری ئەو بارستە ھەوایەوە سبەی
لە كاتەكانی ئێوارە و شەودا بەھۆی زیادبوونی خێرایی با لەناوچە سنوریەكانی نێوان ڕۆژئاوای
عێراق و سوریا ئەگەری ھاتنی شەپۆلێكی خۆڵبارین بەرەو ناوچەكانمان ئەبێت بەڕێژەیەكی
مامناوەند و بە ڕێژەیەكی نیمچە چریش لەسەر ناوچەكانی سنوری پارێزگای كەركوك و سەنتەری
پارێزگای ھەولێر كاریگەری ئەبێت.
ئەو سارەزای
کەشناسییە ئاماژەی بەوەشکردووە، بەگشتی لەنیوەرۆی ڕۆژی دوو شەممەدا ٨ ی ئاب كاریگەری كەم دەبێتەوە و بەڕێژەیەكی كەم تا بەرەبەیانی
ڕۆژی سێ شەمە ٩ ی ئاب تۆز و خۆڵ لەھەوادا ئەمێێتەوە و دواتر كۆتایی دێت.
ئەوەشی باسکردووە، كاریگەری
ئەم بارستە ھەوا فێنكە لە ڕۆژی دوو شەممەوە بەتەواوی دەگاتە سەر ناوچەكانمان و پلەكانی گەرما
نزمبوونەوەی زیاتری بەسەردا دێت تا ڕۆژی ھەینی ١٢ی ئابی ٢٠٢٢ كاریگەریەكانی بەردەوامی
دەبێت و ئەم مەودایە بەگشتی تێكڕای پلەكانی گەرما لە ئاستی ئاسایی ساڵانەی خۆیدا ئەبێت.