ئێوارەی ئەمڕۆ هەینی سەرۆکی هاوپەیمانی نەسر پەیامێکی نوێی ئاراستەی لایەنگرانی رەوتی سەدر و چوارچێوەی هەماهەنگی کرد و دەڵێت" رووبەڕووی گەندەڵکاران ببنەوە تەنانەت ئەگەر لە کەسوکاری منیش بن".
حەیدەر عەبادی، سەرۆکی هاوپەیمانی نەسر و سەرۆک وەزیرانی پێشووتری حکومەتی عێراق لە تویتێکدا ئاماژەی بەوەکردووە" داوا لە نیشتمانپەروەران و لایەنگرانی هەردوو رەوتی سەدر و چوارچێوەی هەماهەنگی دەکەم، هاوکاربن بۆ چارەسەرکردنی دۆخەکە و خزمەتکردنی هاونیشتیمانیان و پێکەوە کار بۆ رووبەڕووبوونەوەی گەندەڵی و گەندەڵکاران بکەن، تەنانەت ئەگەر لە کەسوکاری منیش بن".
وتیشی" ئێمە دەوڵەتێکی دادپەروەر و خزمەتکردنی خەڵکمان دەوێت، لە دادپەروەریدا بەرفراوانی هەیە، بەڵام بژێوی، بەرژەوەندی و ئاسایشی هاونیشتیمانیان سنووردار نەکەن، لە موڵکی گشتی و تایبەتیش دووربکەونەوە".
ئەمڕۆ لایەنگرانی ڕەوتی سەدر و چوارچێوەی هەماهەنگی لە ناوچەی سەوزی بەغدای پایتەختی عێراق دەستیان بە خۆپیشاندان کرد و تا ئێستاش خۆپیشاندانەکە بەردەوامی هەیە.