وەزیری تەندروستیی عێراق رەزامەندی لەسەر دامەزراندنی دوو ھەزار و ٨٠٠ دەرچووی بەشە پزیشکییەکانی سنووری نەینەوا دەرکردووە و دادەمەزرێندرێن.  

ئەمڕۆ سیشەممە ١٦ ی ئاب، ئەحمەد دووبەردانی، جێگری بەڕێوەبەری تەندروستیی نەینەوا بە ماڵپەڕی فەرمیی پارتیی ڕاگەیاند، " دوای ھەولێکی زۆر توانیومانە ناوی دوو ھەزار و ٨٠٠ دەرچووی بەشە پزیشکییەکانی سنوری مادەی ١٤٠ لە پارێزگای نەینەوا بۆ حکومەتی عێراق بەرز بکەینەوە و پێش ماوەیەک فۆرمی دامەزراندن بۆ ئەو دەرچویانە پڕکراوەتەوە."  

دەشڵێت "لیستی ناوی دەرچووان رەوانەی وەزارەتی تەندروستیی عێراق کراوە و لە ئێستادا پرۆسەی پاکسازی تێدا دەستی پێکردوە، چونکە ھەموو ناوەکان پێداچوونەوەیان بۆ دەکرێت لە ساڵی دەرچوون و پشتڕاستکردنەوەی بروانامەکانیان."  

ئاماژەی بەوەش داوە، وەزیری تەندروستی لیستی ناوەکانی پەسەندکردوە و تەنیا ماوەتە پرۆسەی وردبینی لە لیستی ناوەکان ئەوەیش کۆتایی بێت ئەگەر ھیچ ناوێک کێشەی نەبێت ھەمویان دادەمەزرێن لەسەر میلاکی وەزارەتی تەندروستی عێراق پەرلەمانتارانی پارتیش رۆڵی سەرەکیان ھەیە لەو دامەزراندنە.