پەرلەمانتارێكی دەستلەكاركێشاوەی سەدر رایدەگەیەنێت "لە ئەگەری ئەنجامدانی كۆبوونەوەی پەرلەمان بۆ هەڵبژاردنی سەرۆك كۆمار و ڕاسپاردنی سەرۆك وەزیران، بۆ هەمیشە دەرگای تەوافوق دادەخرێت".
حەیدەر ئەلمحەمەداوی، پەرلەمانتاری دەستلەكاركێشاوەی سەدر رایگەیاندووە "دانیشتنی هەڵبژاردنی سەرۆكی كۆمار و راسپاردنی سەرۆك وەزیران، یەكلاكەرەوە دەبێت ئەگەر ئەنجام بدرێت، لەو كاتەشدا بۆ هەمیشە لاپەڕەی تەوافوق و پشك پشكێنە دادەخرێت".
بەپێی سەرچاوەیەكی ئاگادارەكان، هاوپەیمانی ئیدارەی دەوڵەت پلانی هەیە ڕۆژی 30ی ئەم مانگە بۆ هەڵبژاردنی سەرۆك كۆمار و دیاریكردنی كاندیدی سەرۆك وەزیران دیاری بكات.
هەر بەپێی ئەو سەرچاوانە هاوپەیمانیی ئیدارەی دەوڵەت ڕەزامەندی دەربڕیوە لەسەر دیاریكردنی ڕۆژی 30ی ئەم مانگە بۆ بەڕێوەچوونی دانیشتنی پەرلەمان بۆ هەڵبژاردنی سەرۆك كۆمار و دیاریكردنی كاندیدی سەرۆك وەزیران لەلایەن چوارچێوەی هەماهەنگییەوە.