ئەدهەم بارزانی کە ئێستا ناکۆکە لەگەڵ مەسعود بارزانی سەرۆکی پارتی لە سلێمانییەو لە پلانیدایە چەند بارەگایەک بۆ ڕێکخراوەکەی لەو پارێزگایە و لە هەڵەبجە و گەرمیان بکاتەوە.
سەرچاوەیەکی نزیک لە ئەدهەم بارزانی بە ماڵپەڕی ( سپی ) راگەیاند " ئەمڕۆ شەممە ئەدهەم بارزانی گەیشتۆتە شاری سلێمانی و لە پلانیدایە چەند بارەگایەک لە سنوری پارێزگای سلێمانی و هەڵەبجە و ئیدارەکانی ئەو ناوچەیە بە گەرمیانیشەوە بکاتەوە، بەڵام تا ئێستا بڕیاری کۆتایی لەسەر نەداوە".
ئەو سەرچاوەیە ئاماژەی بۆ ئەوەش کرد کە ئەدهەم بارزانی لەسەروبەندی دروستکردنی رێکخراو و کردنەوەی بارەگایە بۆ ئەو رێکخراوەی، بەڵام هێشتا بڕیاری تەواوی لە بارەوە نەدراوە.
ئەدهەم بارزانی لە مانگی ٩ ساڵی ٢٠٢٠دا دەستی لە پارتی کێشایەوە، پێش ٣ مانگ لەمەوبەر لە دەروازەی حاجی ئۆمەران ئاستەنگی بۆ دروستکراو نەگەڕایەوە بۆ کوردستان، لەو کاتەوە لە ئێران ماوەتەوە، بەڵام رۆژی پێنج شەممەی رابردو لە ناکاو لە کۆبوونەوەیەکدا لەگەڵ بافڵ تاڵەبانی دەرکەوتەوە.