وتەبێژی پارتی دیموكراتی كوردستان رایدەگەیەنێت، وەك پارتی بەرنامەیان ئەوەیە لەگەڵ حیزبەكان بە گشتی لاپەڕەیەكی نوێ هەَلبدەنەوە.
مەحمود محەمەد، وتەبێژی پارتی دیموكراتی كوردستان لە كۆنگرەیەكی رۆژنامەوانیدا رایگەیاند "لاپەڕەیەكی نوێ بۆ گفتوگۆ و لێكتێگەیشتن لەگەڵ لایەنە سیاسییەكان بە گشتی دەكەینەوە و هەوڵ دەدەین ئەو هاوبەشانەی كە هەمانە لەگەڵ لایەنەكان جەختی زیاتری لەسەر بكەینەوە، دروستە ئێمە لەگەڵ ئەو حیزبانە بە هەندێك جیاوازییەوە كێبڕكێ دەكەین، ئەو جیاوازییەش هەر دەبێت، بەڵام هاوبەشیشمان زۆرە و دەبێت جەخت لەوانە بكەینەوە، ئەوەش ئەوانەن كە لەبەرژوەندیی هاونیشتمانییانی هەرێمی كوردستانن، بۆیە بە بڕیاری كۆنگرە و بڕیاری جەنابی سەرۆك لاپەڕەیەكی نوێ دەكەینەوە، هیوادارین ئەو لاپەڕەیەی ئێمە ببێتە هۆكارێك بۆ كردنەوەی دەرگەی زیاتری لێكنزیكبوونەوە و چارەسەركردنی گرفتەكان."
وتەبێژی پارتی جەختی لەوەكردەوە، ئەوانەی لە پارتیدا پۆستی حیزبی وەردەگرن دەبێت دەستبەرداری پۆستی حكومی و پەرلەمانی بن و كەسی دیكە بخرێتە جێگەیان، بۆ ئەوەش هەنگاوی پێویست نراوە.
لەبارەی كۆبوونەوەی ئەمڕۆی یەكێتیی نیشتمانیی كوردستان لەگەڵ لایەنە سیاسییەكان، وتەبێژی پارتی باسی لەوە كرد: "پێشتر ئێمە دەستپێشخەریمان كرد و هەوڵمان داوە دەرگەی گفتوگۆمان واڵابێت بۆئەوەی گفتوگۆ بكەین و ئەگەر كێشەیەك هەبێت لە رێگەی راگەیاندنەوە چارسەری نەكەین، بەڵكو لە رێگەی دانیشتن و گفتوگۆ چارەسەری بكەین، چەند كۆبوونەوە زیاد بكەین، كێشە دروست نابێت ئەوەندەی كە گرفت دەبێت قسەیەكی زبر لە راگەیاندن بكەین و دووبەرەكی دروست ببێت، بۆیە ئەو بڕیارە جێبەجێ دەكەین."