سەرۆكایەتی هەرێمی كوردستان رایدەگەیەنێت، سەردانی نێچیرڤان بارزانی، سەرۆكی هەرێمی كوردستان (ماوەبەسەرچوو) بۆ بەغدا جەختكردنەوە بووە ەوەی بەهیچ شێوەیەك ڕێگە بە هیچ جۆرە هەڕەشە و كردەیەوەكی سەربازی لە سنوورەكانی عێراق و هەرێمی كوردستانەوه بەرامبەر وڵاتانی دراوسێ نادرێت.
سەرۆكایەتی هەرێمی كوردستان لە راگەیەنراوێكدا رایگەیاندووە "سەرۆكی هەرێمی كوردستان لە میانی دوا سەردانەكانیدا بۆ بەغدا، لەگەڵ سەرۆك وەزیرانی عێراقی فیدراڵی و لایەنە سیاسییەكان، دوایین پێشهاتەكانی دۆخی ئەمنی و سیاسیی وڵاتیان تاوتوێ كرد و جەختیان لە هاریكاری و هەماهەنگیی نێوان تەواوی لایەنەكان كردەوە بۆ پشتگیری لە حكومەتی فیدراڵیی نوێی عێراق و سەرخستنی كارنامەكەی".
هەروەها وتویەتی "پێكەوەكاركردن بۆ چارەسەركردنی كێشەكانی هەولێر – بەغدا لە مادەی (١٤٠)، بودجە و شایستە دارایییەكان، دۆخی شەنگال و كێشەكانی وڵات بەگشتی بە گفتوگۆ لەسەر بنەمای دەستوور و پاراستنی سەقامگیری و سەروەریی وڵات".
راگەیەنراوەكە ئاماژەی بەوەكردووە "سەرۆك نێچیرڤان بارزانی و سەرۆك وەزیران ئەلسوودانی بە تەواوی هاوڕا بوون و دووپاتیان كردەوە كە بەهیچ شێوەیەك ڕێگە بە هیچ جۆرە هەڕەشە و كردەیەوەكی سەربازی لە سنوورەكانی عێراق و هەرێمی كوردستانەوه بەرامبەر وڵاتانی دراوسێ نادرێت، بۆ ئەم مەبەستەش وەك هەمیشە هاوكاری و یارمەتی پێشكەش بە پەنابەران دەكەن، بەڵام ڕێگە بە بوونی گرووپی چەكدار لە هەرێمی كوردستان نادرێت، بۆیە هەولێر و بەغدا بە تەواوی هاریكاری و هەماهەنگی دەكەن و ئاسایشی سنوورەكان دەپارێزن، لەگەڵ وڵاتانی دراوسێش هاوكار و هەماهەنگ دەبن و ڕێكاری پێویست دەگرنەبەر".
هەروەها وتویەتی "سەرۆك نێچیرڤان بارزانی دڵنیایی دا و جەختی لەوە كردەوە كە هەرێمی كوردستان وەك هەمیشە بۆ عێراق و وڵاتانی دراوسێ و ناوچەكەش بە فاكتەری ئارامی و سەقامگیری دەمێنێتەوە، هەروەها خوازیاری بەرەوپێشبردنی پەیوەندییەكانیەتی لەسەر بنەمای ڕێزلەیەكگرتن و دراوسێیەتیی باش و بەرژەوەندیی هاوبەش. هاوكات بۆ چارەسەركردنی كێشە ناوخۆیی و دەرەكییەكان لە ناوچەكە، بە پێویستی دەزانین هەموو لایەك پشت بە گفتوگۆ و لێكگەشتن و چارەسەری ئاشتیانە ببەستن، بۆ ئەوەش سەركردایەتیی هەرێمی كوردستان ئامادەیە ڕۆڵێكی ئەرێنی و بنیاتنەرانە لەمبارەیەوە بگێڕێت".