پەرلەمانتاری کورد، شەریف سلێمانی عەلی لە راگەیاندنێکدا دژی قەدەغەکردنی مەی دروستکردن و فرۆشتن و کڕینی کە بەم دواییە لە عێراق دراوە، وەستایەو دەڵێت " ئەمە دژی دەستوری عێراقە".
شەریف سلێمانی عەلی لە راگەیاندێکدا جەخت لەسەر ئەوە دەکاتەوە کە ئەو بڕیارە دژی دەستوری عێراقە، مادەکانی دوو و سێ و پانزەو حەڤدە و چەند مادەیەکی تری دەستور.
هەروەها لە راگەیاندنەکەدا هاتووە، مەسەلەی مەی پرسێکی کەسی و پەیوەندی بە ئازادیەکان و دیمکراسیەوە هەیە، ئەوە لە کاتێکدا کە عێراق وڵاتێکی فرە نەتەوەو ئاین و تایفە و کەلتوورەکانە.
دەشڵێت " عێراق هەر لە دروستبوونیەوە لەسەر بنەمای هاوڵاتیبوون دامەزراوە، پێچەوانەی ئەمەش دژی رێبازی دەوڵەتەو لەلایەن گەلی عێراقەوە رەتدەکرێتەوە".
پەرلەمانتارەکە داوا لە دادگای فیدراڵی دەکات کە بە دەم ئەو داوایانەوە بچێت و ئەم بڕیارە رەتبکاتەوە، هەروەها حکومەت بیر لە ئەلتەرناتیڤ بکاتەوەو پەرلەمانی عێراقیش بە ئەرکی خۆی هەستێت بەرامبەر بەرژوەندیەکانی گەلی عێراق و بڕیارێک بدات کە پشت بە دەستور بوەستێت.
پەرلەمانتار، شەریف سلێمانی کوردەو سەر بە فراکسیۆنی پارتییە، هەندێک لە پەیجی تۆڕە کۆمەڵایەتییەکانی شیعەی سەر بە ئێرانیش دژی ئەم بەیاننامەیە وەستانەتەوەو شۆخی پێدەکەن.