حكومەتی هەرێمی كوردستان بەنیازە لەمەودوا لەڕێگەی تانكەرەوە نەوت هەناردەی دەرەوە بكاتەوە.
سەرچاوەیەكی باڵای حكومەتی هەرێم بە (دەنگی ئەمریكا)ی راگەیاندووە "ئەگەر توركیا ڕێگە بە هەناردەكردنەوەی نەوتی هەرێم نەدات و عێراقیش كێشەكە چارەسەر نەكات، بیرمان لەوە كردووەتەوە نەوت بە تەنكەر لە ڕێگەی توركیا و ئێرانەوە بفرۆشین، وەك چۆن بەشێك لە نەوتی سوریا بە تەنكەر دەفرۆشرێت، بەڵام ئەم ڕێگەیە تێچووی زۆری دەوێت".
ئەو سەرچاوەیە ئاماژەی بەوەكردووە "پێشبینی دەكەین بەم نزیكانە لێكتێگەشتن لە نێوان عێراق و توركیا دروست ببێت ناردنە دەرەوەی نەوتی هەرێمی كوردستان دەست پێبكاتەوە، بەپێی ڕێككەوتنی نێوان ئێمە و عێراقیش، هەرێم خۆی نەوتەكەی دەفرۆشێت و داهاتەكەشی دەگەڕێتەوە بۆ خەزێنەی حكومەتی هەرێم، عێراق تەنها سەرپەرشتی پڕۆسەی نەوتی هەرێم دەكات".
بەهۆی بڕیاری دادگای پاریسەوە، ماوەی مانگێكە هەناردەكردنی نەوتی هەرێمی كوردستان لەڕێگەی بەندەری جەیهانی توركیاوە وەستاوە و تائێستاش هیچ ئاسۆیەك بۆ دەستپێكردنەوەی دیار نییە.