هێمن هەورامی، جێگری سەرۆكی پەرلەمانی كوردستان سەبارەت بەگۆڕانكارییەكانی پڕۆژە یاسای بودجە تایبەت بە هەرێمی كوردستان رایدەگەیەنێت "وەك هەمیشە چەند تاقمێك دووبارە دەیانەوێت بمانگێڕنەوە بۆ خاڵی سەرەتایی كێشەكان، ئەوان نان و ژیانیان هەر لە گێژاو دەست دەكەوێت".
هێمن هەورامی، جێگری سەرۆكی پەرلەمانی كوردستان رایگەیاندووە "بەنیگەرانییەكی زۆر لە هەوڵی ژمارەیەك پەرلەمانتار لە لێژنەی دارایی پەرلەمانی عێراق دەڕوانین، دەستكاریكردنی ماف و شایستەكانی خەڵكی كوردستان و دەستبردن بۆ كەمكردنەوەی دەسەڵاتە دەستوورییەكانی هەرێمی كوردستان هەڵەیەكی گەورەی دووبارەبووەوەیە، مێژوو سەلماندوویەتی هەمیشە هەوڵی خۆفەرزكردن و بەكارهێنانی لۆژیكی هێز ئەنجامی پێچەوانەی لێكەوتووەتەوە".
هەورامی ئاماژەی بەوەكردووە "هێز و لایەنە سیاسییەكان دەبێت لەوە تێبگەن كە ماف و ئەركی هاوڵاتییان و بەشێكی وڵات بەخۆ لە بۆسەدانان و دانانەوەی مینی سیاسی وەدینایەت، بەڵكو ماڵوێرانی زیاتری بەدوادا دێت".
ناوبراو وتویەتی "وەك هەمیشە چەند تاقمێك دووبارە دەیانەوێت بمانگێڕنەوە بۆ خاڵی سەرەتایی كێشەكان، ئەوان نان و ژیانیان هەر لە گێژاو دەست دەكەوێت، دەزانن بە چارەسەری ئاشتیانە و كۆتایی قەیرانەكان ڕاستی ئەوانیش دەردەكەوێت و كۆتاییان پێدێت".