ئەنجومەنی دادوەری هەرێمی کوردستان پاڵپشت بە داتاو ئامارەکانی لە ماوەی نێوان ( ٢٠١٣- ٢٠٢٣)، واتە لەماوەی (١٠) ساڵی رابردوو، بڵاویکردووەتەوە" لە ساڵی ٢٠٢٣ زۆرترین هاوسەرگیری لە پارێزگای سلێمانی و جیابوونەوە لە پارێزگای هەولێر تۆمار کراوە، لە دوای نەگونجان و جیاوازی تەمەن خیانەتی هاوسەری گەورەترین هۆکار بووە بۆ حاڵەتەکانی جیابوونەوە".
بەپێی داتاکان ژمارەی لێکجیابوونەوەکان بەراورد بە تۆمارکردنی گرێبەستی هاوسەرگیری لە دادگاکانی هەرێم لە ساڵی (٢٠١٤) لە رێژەی (١٨%)ەوە بۆ ساڵی (٢٠٢٣) بەرزبووتەوە بۆ(٢٧٪).
بە پێی ئامارەکانی ئەنجومەنی دادوەری هەرێم لەماوەی سالانی (٢٠١٤ - ٢٠٢٣) لە دادگاکانی هەرێمی کوردستان (٤٧٢ هەزار و ٥٨١) پرۆسەی هاوسەرگیری تۆمارکراوە کە (٤٤٦ هەزار و ٢٣٤) حاڵەتیان ڕاستەوخۆ لە دادگاکان تۆمار کراون (٢٦ هەزار و ٣٤٧) حاڵەتیان مارەبڕینی دەرەکی بوونەو لە دادگا پەسەندکراون. واتە بە تێکڕا؛ ساڵانە (٤٧ هەزار و ٢٥٨) حاڵەت، مانگانە (٣ هەزار و ٩٣٨) حاڵەت و رۆژانە (١٢٩) مارەبڕین تۆمارکراون.
زۆرترین رێژەی هاوسەرگیری لەساڵی (٢٠٢٣) لە پارێزگای سلێمانی بووە، رێژەی هاوسەرگیری بەم شێوەیە بووە:
١- لە سنوری پارێزگای هەولێر: (١٧ هەزار و ٥٤٣) پرۆسەی مارەبڕین ئەنجام دراوە بە رێژەی (٣٣٪).
٢- لە سنوری پارێزگای سلێمانی: (٢٠ هەزار و ٤٠٧) پرۆسەی مارەبڕین ئەنجام دراوە بە رێژەی (٣٨٪).
٣- لە سنوری پارێزگای دهۆک: (١٢ هەزار و ٤٩٩) پرۆسەی مارەبڕین ئەنجام دراوە بە رێژەی ( ٢٤٪).
٤- لە سنوری ئیدارەی گەرمیان: (٢ هەزار و ٦١٨) پرۆسەی مارەبڕین ئەنجام دراوە بە رێژەی (٥٪).
هەروەها لە ماوەی (١٠) ساڵی ڕابردوودا (٩٦ هەزار و ٤٤) خێزان هەڵوەشاونەتەوە، واتە بە تێکڕا، ساڵانە (٩ هەزار و ٦٠٤) حاڵەت، مانگانە (٨٠٠) حاڵەت و هەموو رۆژێک زیاتر لە (٢٦) حاڵەتی تەڵاق تۆمارکراوە. ساڵی (٢٠٢٣) بەرزترین رێژەی تەڵاقی تێدا تۆمارکراوە.
لە ساڵی (٢٠٢٣) بەرزترین رێژەی جیابوونەوە لە پارێزگای هەولێر بووە، ئامارەکان بەم جۆرەن:
١- لە سنوری پارێزگای هەولێر: (٥ هەزار و ٨٥٧) حاڵەتی جیابوونەوە بە رێژەی (٤١%) تۆمار کراوە.
٢- لە سنوری پارێزگای سلێمانی: (٥ هەزار و ٤٣٨) حاڵەتی جیابوونەوە بە رێژەی (٣٨%) تۆمار کراوە.
٣- لە سنوری پارێزگای دهۆک: (٢ هەزار و ١٦٤) حاڵەتی جیابوونەوە بە رێژەی (١٥%) تۆمار کراوە.
٤- لە سنوری ئیدارەی گەرمیان: (٨٥٣) حاڵەتی جیابوونەوە بە رێژەی (٦%) تۆمار کراوە.
بە گوێرەی راپۆرتی ئەنجومەنی دادوەری هەرێم هۆكارەكانی جیابوونەوە لە هەرێمی كوردستان بریتین لە:"خیانەتی زەوجی، مۆبایل و ئینتەرنێت، نەگونجان، نەزۆكی، ماڵی جیا".
بەپێی ئاماری ئەنجومەنی دادوەری لە هەرێمی كوردستان هۆكارەكانی جیابوونەوە (تەڵاق) بەمشێوەیەیە:
- نەگونجا لەگەڵ یەكتری: ٢٥%
- جیاوازی تەمەن: ١٤%
- خیانەتی زەوجی: ١٣%
- نەبوونی ماڵی جیا: ١٠%
- مۆبایل و ئینتەرنێت: ١٠%
- هۆكاری نەزۆكی: ٩%
- هۆكاری كۆمەڵایەتی: ٩%
- ژنهێنانی دووەم: ٤%
- هۆكاری ئابوری:٣%
- هۆكاری دیكە: ٣%
- هۆكاری ئایینی: ٠%
ئەنجومەنی دادوەری هەرێمی کوردستان پاڵپشت بە داتاکان ئەوەشی خستووەتەڕوو کە لە (١٠) ساڵی ڕابردوودا (٩٦٧) حاڵەت، بە تێکڕا؛ ساڵانە (٩٧) حاڵەت، مانگانە (٨) حاڵەت و هەموو سێ رۆژ جارێک پیاوێک ڕێگەی پێدراوە ژنی دووەم بهێنێت.
بەرزترین حاڵەتی ڕێگەدان بە هێنانی ژنی دووەم لە ساڵی (٢٠١٦) تۆمارکراوە کە (٢٣٩) حاڵەت و کەمترینیشی لە ساڵی (٢٠١٧) بووە کە (٤١) حاڵەتی تێدا تۆمار کراوە.