بەڕێوەبەرایەتی ئاوی سلێمانی رایگەیاند" بەهۆی گڕگرتنی دوو تانکەری سوتمەنی لە قەزای دوکان و رژانی سوتەمەنی بۆ ناو زێی دوکان دابەشکردنی ئاوی دوکان – سلێمانی وەستا".
بەرێوەبەرایەتییەکە لە راگەیەندراوێکدا بڵاویکردووەتەوە و دەڵێت" بەهۆی ڕووداوێکی هاتووچۆی دوو بارهەڵگری سوتەمەنی لە قەزای دوکان هەندێک سوتەمەنی کەوتووەتە زێی دوکانەوە هاووڵاتیان ئاگاداردەکەین لەبەر سەلامەتی تەندروستیان و سەلامەتی پڕۆژەکانمان هەردوو پڕۆژەی ئاوی دوکان سلێمانی دابەش کردنی ئاو تێدا وەستاوە تاکو دڵنیا دەبینەوە لە پاک بوونەوەی ئاوی زێیەکە".
ئێوارەی ئەمڕۆ پێنجشەممە لە قەزای دوکان دوو بارهەڵگری سوتەمەنی بەیەکیاندادا و سووتان، بەهۆیەوە هەندێک سوتەمنی کەوتووەتە ناو زێی دوکان، ئەوە لە کاتێکدایە کە هەفتەی رابردووش بەهۆی رژانی سوتەمەنی بۆ ناو زێی دوکان دابەشکردنی ئاوی سلێمانی راگیرا.