ئەرکی حکومەتی فیدراڵە هەرچی زووە مووچەی هێزەکانی ئەمنی هەرێم بۆ هەردوو مانگی ٥ و٦ خەرج بکات"

ئەمڕۆ کۆبوونەوەی ئەنجومەنی وەزیرانی هەرێم بەڕێوەچوو و تییدا چەند تەوەرێک خرایەڕوو و هاوکات حکومەتی هەرێم چەند داوا لە عێراق دەکات هەرچی زووە مووچەی هێزەکانی پێشمەرگە و ئاسایشی هەرێم بۆ هەردوو مانگی ٥ و٦ خەرج بکات.

حکومەتی هەرێم بڵاویکردەوە، ئەنجومەنی وەزیران بەدواداچوونی بۆ بابەتی مووچەی مووچەخۆرانی هەرێم بە شێوەیەکی گشتی و بە تایبەتیش مووچەی هێزەکانی پێشمەرگە و ئاسایش كرد.

ڕوونیشیکردۆتەوە، بەداخەوە وەزارەتی دارایی فیدڕاڵیی تا ئێستا مووچەی مانگی ٥ و٦ ی خەرج نەکردووە سەرەڕای ئەوەی کە لیستی مووچەی هێزەکانی پێشمەرگە، بۆ وردبینی و پێداچوونەوە، پێشکەش بە تیمی هاوبەشی هەردوو دیوانی چاودێری دارایی هەرێم و حکومەتی فیدڕاڵ کراوە و جەخت لە بەردەوامی ئاسانکاریی وەزارەتەکان بۆ پرۆسەی وردبینی کرایەوە.

ئەوەش خراوەتەروو،  دامەزراوەکانی هەرێم پابەندییەکانی خۆیان بەجێگەیاندووە و ئەرکی حکومەتی فیدڕاڵیشە کە شایستەکانی هەرێمی کوردستان خەرج بکات هاوتای ناوچەکانی دیکەی عێراق و چیتر خەرجکردنی مووچە دوانەکەوێت .

ئەنجومەنی وەزیران داوای لە حکومەتی فیدڕاڵ دەکات هەرچی زووە مووچەی هێزەکانی پێشمەرگە و ئاسایشی هەرێم بۆ هەردوو مانگی ٥ و٦ خەرج بکات، هەروەها داوا دەکات شایستەکانی دیکەی هەرێم لە تەرخانکراوەکانی تەشغیلیی و پڕۆژەکانی ئاوەدانکردنەوە و وەبەرهێنان خەرج بکات کە لە خشتە پەسەندکراوەکانی بودجەی عێراق بۆ ساڵی ٢٠٢٤ پارەیان بۆ تەرخانکراوە.

ئەوەش خراوەتەڕوو، حکومەتی هەرێم لە سەرەتای ٢٠٢٤ ەوە، بەشی گەنجینەی فیدڕاڵیی لە داهاتە نانەوتییەکانی هەرێمی بە کاش بۆ وەزارەتی دارایی فیدڕاڵ ناردووە و مانگانەش لیستی مووچەی مووچەخۆران و تەرازوویی پێداچوونەوەی مانگانەی داهات و خەرجی سەرجەم وەزارەتەکان ،بە شێوەیەکی ڕوون و شەفافانە ئاراستەی وەزارەتی دارایی فیدڕاڵ کراوە.

ئەنجومەنی وەزیران پشتگیریی خۆی بۆ لیژنەی دانوستانکاری حکومەتی هەرێمی کوردستان دەربڕی و ڕایسپاردن کە لە چوارچێوەی دەستور و یاسا بەرکارەکان، درێژە بە گفتوگۆ لە گەڵ حکومەتی فیدراڵ بدەن و لیژنەیەکی یاسایی پسپۆڕیشی ڕاسپارد بۆ ڕێککەوتن لە سەر داڕشتنی میکانیزمی هەماهەنگی لەگەڵ دامەزراوە فیدراڵییەکان تاوەکوو یاسای تایبەت بە دەستەی دەروازە سنوورییەکان هەموار دەکرێتەوە .


PM:06:34:10/07/2024