بەیانی ئەمڕۆ پێنجشەممە ٥ی ئەیلولی ٢٠٢٤، لەگەڵ کردنەوەی بازاڕەکانی نەوت لە رۆژهەلاتی ئاسیا نرخی نەوت بە بەراورد بە رۆژانی رابردوو دابەزینی بەخۆوە بینی.

نرخی یەک بەرمیل نەوتی برێنت لە ئێستادا بە ٧٢ دۆلار و ٨٠ سەنتە، لە کاتی داخستندا بە ٧٢ دۆلار و ٩٦ سەنت بوو.

نرخی یەک بەرمیل نەوتی خاوی ئەمەریکی بە ٦٩ دۆلار و ٣٩ سەنت مامەڵەی پێوە دەکرێت، دوێنێ لە کاتی داخستندا بە ٦٩ دۆلار ٤٩ سەنت بوو.

ئەو دابەزینە لەپڕەی نرخی نەوتی برێنت، نزمترین ئاستییەتی لەماوەی نۆ مانگی رابردوودا، کە هۆکارەکەشی بۆ ئەو گرژی و ناکۆکییە سیاسییانەی بەندەرەکانی لیبیا دەگەڕێتەوە لەسەر هەناردەکردنی نەوت و چاوەڕوانییەکان بۆ چارەسەربوونی ئەو گرفتانە.

شارەزایانی ئابووری باس لەوەدەکەن، بەهۆی ئەو ناکۆکیانەوە بازاڕەکان فشاریان لەسەرە و خواست لەسەر نەوت کەمبووەتەوە.

لەلایەکی دیکەوە بەپێی ئامارەکان، کەرتی بەرهەمهێنانی ئەمریکا سەرەڕای ئەوەی پێشکەوتنی بەخۆیەوە بینیوە لە مانگی رابردوودا، بەڵام هێشتا لە لاوازترین ئاستی هەشت مانگی رابردوودایە.