نێچیرڤان بارزانی وەڵامێکی ئەرێنی پەیامەکەی کۆسرەت رەسوڵ دەداتەوەو دوای یەکڕیزیەکی سیاسی تازە لە یەکێتی دەکات.
لە وەڵامی پەیامەکەی کۆسرەت رەسوڵدا نێچیرڤان بارزانی دەڵێت: پێمانوایە هاوپەیمانیەتیی چەند ساڵەی نێوان پارتی دیموكراتی كوردستان و یەكێتیی نیشتمانیی كوردستان، ئەركێكی زیاتر دەخاتە سەر شانی هەردوولا بۆ دروستكردنەوەی سازان و یەكڕێزییەكی تازەی سیاسیی نیشتمانی لە كوردستاندا.
دوێنێ ٨/١٤ کۆسرەت رەسوڵ لە پەیامێکدا لەسەر پرسی سەرۆکی هەرێم ئاماژە بۆ ئەوە دەکات کە بگەڕێینەوە بۆ پرۆژەکەی د. بەرهەم ساڵح و هەروەها داوا لە جەماوەری لایەنەکان دەکات فشار بکەن لە سەرکردایەتی حیزبەکان تابگەرێنەوە بۆ سازدان.
دەقی پەیامەكەی نێچیرڤان بارزانی:
ئەمڕۆ بەڕێز كۆسرەت ڕەسووڵ عەلی، جێگری یەكەمی سكرتێری یەكێتیی نیشتمانیی كوردستان، لە پەیامێكدا داوای سازانی لە هەموو لایەنەكانی كوردستان كرد و پشتیوانیی خۆیشی بۆ پڕۆژەی بەڕێز بەرهەم ساڵح جێگری دووەمی سكرتێری گشتیی یەكێتیی نیشتمانیی كوردستان ڕاگەیاند.
ئێمە پشتیوانی لەو پەیامەی بەڕێز كۆسرەت ڕەسووڵ دەكەین لەپێناو سازاندا و دووپاتی دەكەینەوە كە پارتی دیموكراتی كوردستان هەوڵێكی زۆری دا لەپێناو یەكڕیزیی نیشتمانی و دروستكردنی سازان، ئێستاش پێداگیری لەسەر پاراستنی یەكڕیزیی نیشتمانی دەكەینەوە و پێمانوایە هاوپەیمانیەتیی چەند ساڵەی نێوان پارتی دیموكراتی كوردستان و یەكێتیی نیشتمانیی كوردستان، ئەركێكی زیاتر دەخاتە سەر شانی هەردوولا بۆ دروستكردنەوەی سازان و یەكڕێزییەكی تازەی سیاسیی نیشتمانی لە كوردستاندا.
لە هەمان كاتدا لەو بڕوایەداین كە پڕۆژەی بەڕێز بەرهەم ساڵح دەتوانرێت وەك بنچینەیەكی گفتوگۆكردن تەماشا بكرێت بۆ گەیشتن بەو سازان و یەكڕیزییەی كە خەڵكی كوردستان و دۆستانمان داوای دەكەن.
نێچیرڤان بارزانی
جێگری سەرۆكی پارتی دیموكراتی كوردستان