ئەمشەو فڕۆكەکانی توركیا دەڤەری برادۆستیان تۆپباران كرد و ڕووبەڕووبوونەوەیەكی سەخت لە نێوان گەریلاكانی پەكەكە و سەربازانی سوپای توركیا دەستیپێكرد.
بەپێی ئەو زانیاریانەی دەست ماڵپەڕی "سپی" کەوتووە، ئەمشەو لە سنوری دەڤەری برادۆستی پارێزگای هەولێر، فڕۆکە جەنگیەکانی تورکیا بۆردوومانی گوندی کونڵە و ناو مێرگان و گەلی ڕەشیان لە سنوری برادۆست کرد.
هەر بەپێی زانیارییەکانی "سپی"، ڕووبەڕووبوونەوەیەكی سەخت لە نێوان سەربازانی سوپای توركیا و گەریلاكانی پارتی كرێكارانی كوردستان (پەكەكە) ڕوویدا، هاوکات تا ئامادەکردنی ئەم هەواڵە زیانە گیانی و مادیەکانی هاوڵاتیان نەزانراوە و تۆپبارانەکە بەردەوامە.
فڕۆکە جەنگییەکانی تورکیا بەردەوام بە ئاسمانی سنورەکانی برادۆستدا دەسوڕێنەوە، کە ئەمەش ترس و دڵەڕواکێی لای دانیشتووانی سنورەکە دروستکردووە.
له‌ناوه‌ڕاستی مانگی ئایاری ئه‌مساڵه‌وه، توركیا بۆردومانكردنی ناوچه سنوریه‌كانی هه‌رێمی كوردستانی به‌چڕی ده‌ستپێكردوه و له‌چه‌ند ناوچه‌یه‌كیش روبه‌ڕوبونه‌وه له‌نێوان گه‌ریلاكانی پارتی كرێكارانی كوردستان و سوپای توركیا رویداوه.