بێ ئەوەی ئاسۆی وەستانی بەدی بکرێت، تا ئێستا جەنگی ڕوسیا و ئۆكراینا بەردەوامە ، ڕوونە و شاراوەنیە کە ئەم جەنگە بەرلەهەمووشت زیانی گەورەی بۆ گەلانى ئۆکرانیا و ڕوسیا هەیە ،بێگومان پریشکیشی بەر گەلانی ڕۆژهەڵاتی ناوەڕاست و ئەفەریقیا دەکەوێت و بگرە ئەوروپا و ئەمەریکاش باجەکەى دەدەن.

زیانەکانی ئۆکرانیا بەهۆی ئەو کوشتارو کاولکاری و ئاوەرەیی و دەربەدەریەوەیە کە لە میانى جەنگەکە توشی دەبن، زیانەکانی گەلانى ڕوسیاش بەهۆی سزا ئابووری و خەرجییەکانی جەنگ و لەدەستدانی سەربازانیان خۆی دەبینێتەوە ، زیانەکانی  گەلانی ڕۆژهەڵاتى ناوەڕاست بەهۆی گرانى نرخى گەنم و جۆ و دانەوێڵە و ئاردو پێداویستیەکانی تر دەردەکەوێت، گەلانی ئەوروپاش بە هۆی گرانبوونى نرخی گاز و نەوت و سوتەمەنی و خواردنەوەیە.

‏‎ئەم جەنگە  جارێکی تر خەڵکى زەحمەتکێش و دەرامەت سنوردار و ڕەشو ڕوتى دونیا دەبێتە قوربانى و باجدەری ڕاستەخۆ و ناڕەستەوخۆی.

‏‎ئەو شەڕەی  ٢٤شوباتى ئەم ساڵ هەڵگیرسا ، ڕەگەکەى دەگەڕێتەوە  بۆ مێژوویەکى دورتر ،بەدیاریکراوی بۆ سەرەتاکانى جەنگی سارد.

‏‎ئەم جەنگە گەر لە ڕووکەشدا لە پێناو داوا و داخوازی ئاسایشدایە ، بەڵام  لە جەوهەردا جەنگە لەسەر کۆنترۆڵکردنی سەروەت و سامانى سەر زەوى و ژێر زەوی و نەوت و گاز و هێڵەکانى گواستنەوەى ئەو سامانە سروشتیانە.

‏‎ساڵانێکە ئەمەریکا و یەکێتى ئەوروپا بە جۆرەها ئامرازی ئابوورى و سەپاندنى سزا و فراوانکردنى جوگرافیاى ناتۆ ،هەنگاوی هەستیار و مەترسیدار دەنێن ،ئەویش بەمەبەستی سەپاندنى هەژموونى خۆیان و لە چوارچێوەدانی ڕوسیا.

‏‎ناتۆ بە سەرکردایەتى ئەمەریکا ڕۆژ بەڕۆژ مەیل و کردەى تەمحکارانەى بۆ دونیا و سەروەتەکانى نێو زەوى سەرزەوی زیاد دەکات، ئەم هاوپەیمانیتیەی کە هاوپەیمانیەتی  چەک و جەنگ ، کە لە بنەڕەتدا وەک پەرچەکردارێک بەرامبەر هاوپەیمانى وارشۆ دروست بوو،  بەڵام بەهەڵوەشاندنەوەى هاوپەیمانیەتی وارشۆ و یەکێتى سۆڤیەت ،ناتۆ نەک خۆی هەڵنەوەشاندەوە بەڵکو خۆی فراوانتر کردەوە و ژمارەى ئەندامانى لە ڕۆژهەڵاتى ئەوروپا و دەوڵەتەکانى پێشووى نێو یەکێتى سۆڤیەت فراوانتر و زیاتر کرد، ئەمە جگە لە کردنەوەى بنکەى سەربازى و مەشق و ڕاهێنان و مانۆڕی سەربازی زیاتر لە وڵاتانى سنوری ڕوسیا .

‏‎ناتۆ و ئەمەریکا پشتیوانیان لە شۆڕشی پرتەقالی  ٢٠٠٤ کرد ، کە برجوازەکانى ئۆکراین ئەنجامیاندا ، هەروەها پشتیوانیان لەکودەتاى خوێنایەکەى ٢٠١٤ی راستڕەوەکانى ئۆکرانیا کرد، ڕوسیاش دەستەوسان نەوەستا، ئەوە بوو لە ساڵی ٢٠١٤ نیمچە دورگەی قرمی کۆنترۆڵ کرد و دەستى کرد بە یارمەتیدانى سەربەخۆخوازەکانى ڕوس و دۆمباس.

جەنگی روسیا و ئۆکراین، حەڵقەیەکە لە زنجیرە ململانێیەكان، کە پێناچی تەنانەت دواى ڕێککەوتنى ئاشتى نێوان هەردوو وڵات کۆتایی بێت.

‏‎ململانێکە بۆتە زۆرنبازێیەکی توندی نێودەوڵەتى، هەرجارە و دەست بۆ ئامرازێک دەبرێت ، بەمەبەستی لاوازکردنی هەژموونی یەکتری، کار گەشتوەتە ئەوەی بە ڕوونى و ڕەوانى باسی بەکارهێنانى چەکی کۆکوژی{ئەتۆمیشی} تێدا دەکرێت.

‏‎بەمجۆرە سیستەمی سەرمایەداری لە میانەى ململانێکانى لە پێناو قازانج و بەرژەوەندیدا، وڵاتان پەرت دەکات و دەیانکاتە دوژمنی یەکتر، برسێتى زیاتر و بێکاری زۆرتر، نەخۆشی و مەینەتی و کاولکاری و قەیرانى خۆراک و بەد خۆراکی،هەموو ئەمانە  بەشێکن لە میکانزمی درێژەدان بەتەمەنى خۆی.ا

لەمێژووى دێرین و بگرە هاوچەرخیشدا گەلانی ڕوسیا و ئۆکرانیا دوو گەلی برا و بێکیشە بوونە، ئەوەتا بەهۆی سیاسەتە وەحشیگەرانەی سەرمایەداری ئەم دوو گەلەی کردە دوژمن.

‏‎بۆیە ئەركی سەرەكی حیزب و لایەنە سیاسییەكانی كورردستان و ڕێكخراوەكانی كۆمەڵگای مەدەنی و نووسەران و ڕۆشنبیرانە، كە لە میانى کار و خەباتى ڕۆژانەیان ئەم ڕاستیانە  بۆ  خەڵکى کوردستان ڕوون بکەنەوە، هەمیشە جەخت لەسەر ئاشتى و برایەتى نێوان گەلانى دونیا بکەن، چونكە ساڵانێكە گەلی كوردستان باجی شەڕو ململانێی ھەرێمایەتی و  نێودەوڵەتی و كاریگەرییە سلبیەکانی دەدات ، لە لایەكی ترەوە  پێویستە لە سەر دەسەڵاتدارانی هەرێم بەڕاستەو خۆ و ناڕاستەو خۆ  ھەرێمی كوردستان بە دوور بگرن لەم شەڕە خوێناوییە ، چونكە  ئەم جەنگە تەنھا لە نێو دوو دەوڵەتدا نیە ، بەڵكو لە نێو دوو میحوەردایە ،جا ھەر ترازانێك بۆ ھاوكاری وپشتگیری تەرەفیكیان ،ئیدی هەرجۆرە پشتگیریەک بێت، ئەو دەمە دەبینە بەشێك لەو میحوەربەندییەو لە ئەنجامدا زیانی گەورە دەكەین.