ساڵانێکە رۆژانە دەنگ و پەیامی "نوخبەیەکی" نارازی دەبیستین و دەخوێنینەوە کە باس لە خواست و خەونەکانیان بۆ گۆرانکاری دەکەن. مەخابن تا ئەم چرکەیەش ئەو نوخبە پەرتەوازە و نەگونجاوە لە گەڵ یەکتر بە گەلێک هۆکاری لاوەکیەوە لە سەر کارنامەیەکی هاوبەش کۆک نین و هەر یەک لێیان لە ئاوازێک دەخوێنێت. کورتبینین و کەنارگیری ئەم " نوخبە" هۆکارێکی گرنگی سەرلێشێواندنی هاوڵاتی و کەڵەکەبونی خەستی بێ ئومێدیەتی.
لەو ماوە درێژەشدا دەسەڵاتی کوردی لە سایەی ئەم دۆخەدا بزەی سمێڵی دێت، مەبەستی سەرەکیم پشکی یەکێتی و گۆڕانە لە دەسەڵات، چونکە پارتی بێ ئەو دو هێزەش حوکمران و دەسەڵاتدارە و خواست و مەرامەکانیشی ناشارێتەوە، دو هێزەکەی تر بە قسە قبلەی گۆرانکاری و چاکسازین، بە کرداریش لە بەردەم دەروازەی قەڵای پارتیدا ریزیان گرتوە، پارتیش بێ باکانە بە تورەکە پارە و تەنەکە نەوت ختوکەیان دەدات. ئەڵتەرنەتیڤ بۆ ئەو دو هێزە لە گەڵ پارتی یەک رو بن یاخود لە گەڵ گروپ و نارازیەکان بژاردەی ئۆپزسیۆنێکی راستەقینە بکەن. ئەو دو هێزەش کە ئێستا بەناو هاوپەیمانی یەکترن خەتابارێکی سەرەکی ئەم دۆخە دژوار و نالەبارەی باشی کوردستانن.
هێزە ئیسلامیەکان کارنامە و مەرجەعی جێگیریان هەیە، دوکانە سیاسیەکانیش لە شۆستەی سیاسیدا لێرە و لەوێ و لە موناسەبەکاندا دەبیسترێن و دەبینرێن.
چەندین جار رویداوە کاتێک هاوڵاتیان خۆرسکانە دەرژێنە شەقامەکان و داوای مافەکانیان دەکەن دەسەڵات دڵگران و تورە دەبێت و بە فیشەک و کوشتن و گرتن و ستەمکاری وەڵامیان دەدەنەوەو. لەمەشدا تاوانی قورس کەوتۆتە ئەستۆی یەکێتی، نوخبەی سەرلێشێواویش تورەیی و هەڵچونی هاوڵاتیان دەقۆزێتەوە و سواری شەپۆلەکانی دەبن. ئەم نوخبەیە بە گیرفانی پر و لە ئۆفیسی رازراوەدا ئولفەتیان لە گەڵ گۆرانکاریدا گرتوە و یەخەشی بەرنادەن. گەر خۆشیان رابەرایەتی ئەو پرۆسەیە نەکەن ئەوا دڵگران دەبن و ترس لێیان دەنیشێت لە لەدەستدانی رۆلی " فریادرەسی سەرکردایەتی نوخبە".
ئەم نوخبەیەی گۆرانکاری وەهمی لە زۆر سوچ و قوژبنی هێزە شکستخواردوەکان و شەقامی سیاسیدا خۆیان حەشارداوە، تێیاندایە تا سەر ئێسک سودمەند و گەندەڵچی و دو روە، هەندێکیشیان هەزار پێی لێرە و لەوێ چەقاندوە، بەشێکیش دڵسۆزانە هێشتا باوەری بە گۆرانکاری و چاکسازی دەسکردی دەسەڵات ماوە.
لە هەڵبژاردنەکانی ئۆکتۆبەردا بینیمان چۆن هاوڵاتی سزای قورسی ئەو هێز و گروپانەی دا بە پارتیشەوە، ئەم روداوە مێژوییە هەستیارە دەروازەی گەورە و سەرەکیە بۆ دارشتنی کارنامەیەک کە هیوای سەرکەوتنی لێ دەکرێت.
لە زۆر شوێنی دنیادا رویداوە کە دەسەڵاتی ستەمکار دەتوانێت بۆ ماوەیەک هاوڵاتی بە پارە و ئیمتیاز و پۆست و زەبری چەک بێدەنگ بکات، بەڵام لە هیچ ئەزمونێکی دنیادا تاسەر بۆ دەسەڵاتەکان نەچۆتە سەر.
دەبینین گۆڕان پاش گێرانەوەی بۆ خاڵی سفر هێشتا خۆی بە خاوەنی رەسەنی گۆرانکاری دەزانێت، شەو و رۆژ سەرقاڵن چۆن پەیامی نوێیان دارێژن و کام روخسار ببێتە ئاوێنەی ئەو پەیامە، خەمخۆری کورەکانی کاک نەوشیروان بۆ گۆران ئەوەندەی گرێدراوە بە پاراستنی ئیرسی مەعنەوی و رۆشنبیری کاک نەوشیروان کە مافێکی رەوایە ئەوەندە پرسی گۆرانکاریان لە ئایندەدا لا مەبەست نیە.
یەکێتیش بێجگە لەوەی کەوتونەتە گیانی یەکتر کە قسە دەکەن دەڵێیت فریشتەن و لە هەسارەیەکی ترەوە بۆ سلێمانی نێردراون و پەیامی پێغەمبەر ئاسا دەچرنەوە.
نەوەی نوێ تا ئەم چرکەیەش بەتەواوی خۆی یەکلا نەکردۆتەوە، تموحێکی زۆری لەسەر ژمارەی کورسی هەڵچنیوە نەک نیەت و ئیرداە و ئامرازی دروست بۆ گۆرانکاری جدی، بۆ نمونە فرۆشتنی بەنزین بە هەرزان جۆرێکە لە ململانێی و تەحەدای کاتی و ریکلام بێ کاریگەری ئەوتۆ.
لەم دۆخەدا گرنگترین هەنگاو راستگۆیانە گەرانەوەیە بۆ هاوڵاتی، تایبەت لە ناوچەکانی زۆنی کەسک و نیللی، گۆرانکاری راستەقینە و جێگیر لە ئیرادەی هاوڵاتیەوە سەرچاوە دەکات نەک لە قسەی سواوی ئەم سەرکردە و ئەو بەرپرس و ئەو چالاکوان. هێزەکانیش هەمویان کەتونەتە گیانی یەکتر و لە کەمینیشدان بۆ یەکتر کەچی دۆگمای یەکریزی و یەکگرتویی و کاری هاوبەش دەچرنەوە.
ماوەیەکی کەم ماوە بۆ هەڵبژاردنەکان بۆ پەرلەمانی کوردستان ( گەر دوا نەخرێت)، ئەوەی پێویستە دەنگە نارازیە رەسەنەکان بە چڕوپڕی لە گەڵ هاوڵاتیان دەست بە حوارێکی جدی ئامانج بەخش بکەن لەسەر تەوەری ئەرک و مافی هاوڵاتی نەك بەڵێن و قسەی زل کە بۆیان نەکرێت، پێویستە لە ناخ و دەرونی هاوڵاتیان تێبگەن، لە نزیکەوە تێبگەن هاوڵاتی چی بۆ ئێستا و ئایندە دەوێت و چی پێویستە بکرێت.
سەرەتای ئەم پرۆسەیە بە گوێگرتنی جدی لە هاوڵاتی دەست پێدەکات نەک بەخشینی وەعز و دروشم و ئەجێندای حزب و دەستە و رەوت و ئاراستە، بنیاتنانی متمانە لە گەڵ هاوڵاتی بێ دەسەلات و ستەم لێکراو و برسی و دەربەدەرکراو ئەرکێکی زۆر قورسە، کاتێک ئەم ئەرکە نەبێتە واقع گۆرانکاری وەهمی گەشەدەکات و نەتەوە و نیشتمان باجە قورسەکەی دەدەن.
بۆ خۆم لە رەوتی ئایندەی نیشتمان (رەوا) کاردەکەم، رەوتێک یەک نەفەس و نیەتی حزبایەتی تێدا بەدی ناکرێت، گرتبونەوەیەکە بۆ هەر مرۆڤێک باوەری بە رۆڵی هاوڵاتی لە گۆرانکاری و بنیاتنانی ئایندە هەبێت، بژاردەی بنەرەتی رەوا ئەوەیە هاوڵاتی دەتوانێت نوێنەری راستەقینەی هاو هاوڵاتیەکەی بێت، گەر هەمو پابەند بین بە هاوڵاتی ئەوا گۆرانکاری گەورە بێ رشتنی یەک دڵۆپە خوێن دەبێتە واقع.