ئەگەر زۆر بە وردی و قووڵی لەسەلارخۆ تێرٍامانێكی وەزع و ژیانی ئەم قۆناغەی خەڵكی كوردستان بكەین، ئەوەی تێیدا تێدەپەرٍێت زۆر ئاڵۆز و بێ وێنەیە لە مێژوودا. با زۆر بە گەشبینیەوە قسە بكەین بۆ ئەوەی بێلایەنی لە هەڵسەنگاندنەكەماندا فەراهەم بكەین، بەڵێ لە زۆر لای ژیانی خەڵك گۆرٍانكاری روویداوە و وایلێهاتووە زیاتر خودی تاكی كورد لە جەنجاڵی ژیاندا سەرقاڵە و هەستی پێناكات ئەگینا ئەگەر سۆشیا میدیا و ئەو هەموو هەواڵە كەمەرشكێنەی لێدەركەیت و بەراورداكریەكی لەگەڵا قۆناغەكانی پێشتردا بكەیت، زۆر شتت بۆ روون دەبێتەوە. ئەگەر دەسەڵاتی هەرێم تۆزقاڵێك هەست و شكۆی خەڵكی كوردستانی لا گرنگ بوایە، بەو شكست و نەزانیەی دەسەڵاتداریشەوە، دەكرا ئەو هەموو نائومێدیە گەورەیە بەو شێوەیە نەبوایە و هەموو عەقڵەكان بۆ دۆزینەوەی چارەسەر بخرایەتە گەر نەك بێ ئەومیدی و گۆشەگیری و خۆ بەدەستەوەدان باڵی بەسەر هەمواندا بكێشایە.
بەڵێ برسێتی و قاتوقرٍی و نەداری و هەژاری بێهۆكار لە وڵاتێكی دەوڵەمەندا وایكردووە لە ژیانێكی بێ سەروبەر بژێن و هەست بە زوڵمێكی نارٍەوا بكەن و حاڵەتی چەقبەست و نەبوونی هیچ بیركردنەوەیەك باڵی بەسەر زۆرینەی خەڵكدا كێشاوە، لە كاتێكدا دەتوانرا بەو هەموو سەروەت و سامانەی كوردستان بە پێچەوانەی ئەم وەزعە بوایە و خەڵك لەوپەرٍی خۆشی و ژیانی لە بوژانەوەدا بوایە. ئەوەی زۆر جێگەی داخە كە تاك و كۆی گەلی كوردستان باوەرٍیان بە گۆرٍانكاری و دەربازبوون نەماوە، لە كاتێكدا پێشتر لە زۆر قۆناغدا لە بارێكی خراپتر ژیاوە و بەم رادەیە نەگەیشتۆتە خۆبەدەستەوەدان و چەقبەستوویی لە هەوڵ و بیركردنەوە و دۆزینەوەی چارەسەر. باش لە بیرمانە زۆرجار بە قۆناغی هەرەس و هەڵدێران و دارٍمانی گەورەدا رەتبووین و ئاوا بەم شێویە هەموو شتێكمان لەدەست نەدابوو و خۆمان رادەستی پوچەگەرایی و بێبروا بەخۆبوون نەكردبوو.
ئەوەی جێگەی باسە ( بەدوور لە بارودۆخە ئابووری و دەرونیەكە و زوڵم و زۆری دەسەڵات و نەزانی و نەبوونی سەركردایەتیەكی دانای گونجاو) و پێویستە لێرەدا باس بكرێت و بپرسین بۆچی لەم بارودۆخە تایبەتە لە واقعێكی تا رادەیەك ئازادی هەمەجۆردا بەو شێوەیەی لێهاتووە و چارەسەر لەبەردەستدا نیە.
ئەگەر بەراورد بكەین، سەرەرای زۆربوونی نەداری و هەژاری و كەم دەرامەتی بەڵام بە شێوەیەكی گشتی و دیسان بەبەراورد كردن لەگەل قۆناغەكانی پێشتردا؛ وەزعی ئابووری باشترە و لە رووی سیاسیشەوە نیمچە ئازادیەك لە ئارادایە. كەوابێت تاكە هۆكارێك كە وای لە میلەت كردبێت زیاتر بێئومێد بێت و خۆی دابێت بەدەستەوە ئەو مامەڵەیە لە لایەن دەسەڵاتی دەسترۆیشتووی نەزانەوە لەگەڵا باری كۆمەڵایەتی و ئابووری و سیاسیی خەڵك بە گشتی و تاكی كۆمەڵگە بە تایبەتی و فەرامۆشكردنی پێداویستیە دەروونی و مادیە زەروریەكانی خودی تاكی كۆمەڵگایە لە لایەك و لە لایەكی ترەوە بەهەموو جۆرێك بێ شكۆكردنی تاك و كۆی كوردە لە لایەن خەڵكی تازەپێگەیشتووی دەسترٍۆیشتووی نەگونجاو لەگەل قۆناغەكە و پێویستەیكانی كە وای لێكردبێت خەڵك زیاتر هەست بە كەمی لە ناخیدا چەكەرە بكات و باوەرٍی بە خۆی و پرس و كێشە سەرەكیەكەی نەمێنێت و بەردەوام بیر لە شكۆشكاوی خۆی بكاتەوە و نوزەیەك ورەی تێدا نەمێنێت و توانای جوڵەی تێدا بنبرٍبوبێت، واتە بەر لە برسیِتی و نەداری و نەمانی ورە ئەوە شكۆشكاندنیەتی لە لایەن خودی خۆیەوە پەلوپۆی تاكی كوردی شكاندووە و بیركردنەوەی گونجاوی لەگەرٍخستووە . ئەگینا ئەم گەلی كوردستانە زۆر ستەم و نەداری و هەژاری و بێدەرامەتی بینیوە و قۆناغە ناجۆرەكانی رەتكردووە و لە ناخۆشیەكانی دەربازبووە، هەمیشە سەریبەرزبووە بۆیە حاڵی حازر ناتوانێتت تەحەمولی شكۆشكاندن بكات و بارەكە هەڵبگرێت و قۆناغەكە تێپەرٍێنێت و باری سیاسی كوردستان یەكلایی بكاتەوە.