زۆرێک مرۆڤ بە ژن و پیاوەوە، گوفتار و کرداریان یەک ناگرنەوە، بانگەشە بۆ ئامانجێک دەکەن و خۆشیان بەشێکن لە پیشێلکردنی ئامانجەکە. هەڵبەت ئەمە بۆ هیچ کەس ئاسایی نییە، چی جای ئەوانەی باسی بەدەستهێنانەوەی مافەکانی ژنان دەکەن، بەڵام نەک بڕوایان بە قسە و بانگەشەکەیان لە کرداردا نییە، بەڵکو خۆیان بەشێکن لە پرۆسەی پێشێلکردنی مافەکانی ژنان، دەتوانین ئەمە بە شورەیی و دووڕوویی ناوببەین.

پاراستنی مافەکانی ژنان بە گوفتار ناکرێت، بەڵکو هەرکەس بووە چالاکوان و بانگەشەی بۆ کۆتایی تووندوتیژیی دژی ژنان کرد، پێش هەرکەس دەبێت بە کردار بیسەلمێنێ ژنێکی ژنانەیە نەک ژنێکی بانگەشەکار کە خەباتی بۆ ژنان وەکو بزنسێک بەکاربهێنێت، نەک کاتێک بۆی هەڵکەوێ نزیکترین ژن بچەوسێنێتەوە و مافەکانی پیشێل بکات.

خەبات بۆ پاراستنی مافەکانی ژنان تەنها نووسین و کۆبوونەوە و خۆدەرخستن نییە لەبەرچاوی کامێراکانی راگەیاندن، ئەوە بزنسکردنە بە ژن و مافەکانییەوە، ئەوە چەوساندنەوەیەکە لە چاوساندنەوەی ئەو پیاوانە خراپترە کە ژنان دەچەوسێننەوە.

ژنانی راستگۆ بە کردار و گوفتار ئەو ژنانەن پێش ئەوەی هەوڵبدەن ژنان ئازادبن، خۆیان ئازادبکەن، پێش ئەوەی ببنە چالاکوان و بانگەشە بۆ یەکسانیی ژنان بکەن، خۆیان دەبێت یەکسانیخواز و ژندۆست بن، نەک تەنها بانگەشە و کارکردن لە رێکخراوێکی ژنان و خۆنوواندن.

زۆرن ئەو ژن و رێکخراوانەی ژنان کە دوای چەندین ساڵ کارکردن هێشتا خۆیان بڕوایان بە مافەکانی ژنان نییە، خەونیان کوشتنی توانای ئەو ژنانەشە کە لەوان هەڵکەوتووترن، یان دەزانن راستگۆن و بازرگانیی بە مافەکانی ژنانەوە ناکەن.

بۆ ژنی چالاکوان؛ دەروونپاکی و یەکسانیخوازی و مرۆڤدۆستی و ئازادی و ئازایی گرنگە، بۆ رێکخراواکانی ژنانیش ئەوە گرنگە کە ژنی یەکسانیخواز لە خۆیان کۆبکەنەوە نەک ئەو ژنانەی ژن وەکو کەرەستەیەکی بازرگانی و پارەپەیداکردن دەبینن و هیچ جیهانبینییەکی ژنانەیان بۆ دۆزی ژن نییە.