لە 21 /2 / 1988 تا 6/ 9/ 1988 سوپای عێراق، هەشت قۆناغ ئەنفالی لە (دۆڵی خافایەتی ..مەرگە ...قەرەداخ ...گەرمیان ...گۆپتەپەو عەسكەری...دەڤەری شەقڵاوە و رەواندز..بادینان )ی لە ماوەی 198رۆژدا ئەنجامدا، ژن و پیاو مندال و پیر ی ئەو سنوورانەی دەسگیرو بێسەروشوێن كرد، سەراپا گوندەكان خاپور كرد.
لە 3/ 3 / 1988 لە ئەنفالی یەك ئێمە چەند خانەوادەیەك له چەند كوخێك دا بووین لە مێرگەپان ، سوپای ئەنفال لە كۆتەڵەوە ، سورداش و شەدەڵەی گرت ، لە دۆڵە رووتەوە قزلەری گرت ،هیچ بوارێكمان نەما ، هەموومان بە زەحمەتێكی زۆر روومانكردە سەر سنووری عێراق – ئێران ، دواتر روومان كردە رۆژهەڵاتی كوردستان ، كوردەكانی ئەوێ بە جوانترین شێوە پێشوازی و خزمەتیان كردین.
دوای راپەرین جارێكی تر لە كۆچ و رەدا روومان كردە رۆژهەڵات و باكووری كوردستان، ئەوان بێ سنوور رێزیان گرتین، ئەركی نەتەوەیی و نیشتمانی و مرۆیانەی خۆیان بەجێ هێنا .
لە كاتی ئەنفالدا، سوپای عێراق لەشاخ و گردۆڵكە و پێ دەشتەكانی باشووری كوردستان، پەڕوباڵی هەڵۆو تەوارەكانی لەبن دەقرتان، جەستەیانی بە گولە دەبێژا و لە گۆڕەبەكۆمەڵەكان دا ''شوین بزری دەكردن ، كەچی لە كاتی ئەنفال دا ، لە ناوشاری سڵێمانی دا ، شانۆگەری ( هەڵۆ لە لوتكەدا نەبێ نافڕی ) پێشكەش دەكرا.
ئێران و توركیا وسوریاو عێراق ، چەند ناكۆك بن ، بەڵام بەرامبەر بە كورد ، لە (رۆژهەڵات و باكو و رۆژئاواو باشوور)ی كوردستان بە سیناریۆی جیا جیا ، خاوەنی پلان و بەرنامەو نەخشەی ستراتیجی زنجیرە جینۆسایدی كوردن ، ، كەچی حكومەتی هەرێمی كوردستان و یەكێتی و پارتی تا سەر ئیسقان دژایەتی یەكتری دەكەن و جیاوازی لە نێوان سلێمانی و هەولێر دەكەن ، بەڵام سێبەری ئێران و توركیان، پاشكۆی ئەودوو دەوڵەتە زەبەلاحەن، هیچ پلان و بەرنامەو نەخشیەكی وتاری نە تەوەیی یان نییە.
پەرلەمان و حكومەتی هەرێم و سەرۆكایەتی هەرێم ، حیزبە بەرهەڵستكارە كوردییەكانی باكورو رۆژهەڵات و رۆژئاواتاوانباردەكەن ، بە بیانوی ئەوەی بۆ بارەگاكانیان لەسەر خاكی خۆیان نییە، بۆ نەبەردی و چالاكی و داستانەكانیان لەوێ تۆمار ناكەن.
پارتی دیموكراتی كوردستان و یەكێتی نیشتیمانی كوردستان، ئەی ساڵانی زوو لە شۆڕشی ئەیلوول و شۆڕشی نوێ، ئێوە چەند ساڵێك بنكەو بارەگاو دەزگای راگەیاندنەكانتان، لە سەقزو سەردەشت و پاوەو رەزایە بوو، تەنانەت لەسەردەمی حەمەرەزا شا و ئیمام خومینی دا، دەیان سیناریۆی جیا جیاتان نواندووە، بۆ ئەو كاتە ئەو شارانە ی كوردستانی رۆژهەڵات هی ئێوە بوو.
بۆ ئێستا شاخ و گرد و دەشتی كوردستانی باشوورو سەر سنوورەكان بۆ كوردەكانی رۆژهەڵات وباكورو رۆژئاوا حەرام و تاوان بێت ، گەر ئێوە سێبەرو مەقاشی ئێران و توركیا نەبن ،چۆن ئاوا بە ئاسایی رۆژانە ئەوان دەتوانن جینۆسایدی كورد بكەن ، ئەم بێ هەڵوێستی و پاشكۆیەتییەی پەرلەمان و حكومەتی هەرێم و حیزبە سیاسیەكانی كوردستان هاوكێشەیەكی ئیزدیواجی و لاسەنگی شەرمەزارییە.
*هاوڕێیانی خۆشەویست و بەرێز ،تكایە گەر رەخنەو پێشنیارت هەیە، بفەرموو بە زمانێكی لۆژیكانە بینووسە، بەڵام وشەی ناشیرین و نەشیاو و نەبەجێ بۆ بە هیچ كەس و لایەنێك، لەم دیوارەدا جێی نابێتەوە، سوپاس.