فراکسیۆنی گۆڕان لە پەرلەمانی کوردستان راگەیەندراوێکی بڵاوکردەوە و جەختدەکاتەوە، پێویستە حکومەت نەخشەیەکی هەبێت بۆ کۆتاییهان و قەرەبوکردنەوەی لێبڕین و پێدانەوەی پاشەکەوتی موچەی موچەخۆران.
دەقی راگەیەندراوی فراکسیۆنی گۆڕان لە پەرلەمانی کوردستان:
پاش بگرەو بەردەیەكی زۆر، دواجار ئەنجومەنی وەزیرانی عێراق بریاری دا دوای جێبەجێكردنی رێكارەكانی ناو بڕگە و ماددەكانی یاسای بودجەی ساڵی (2020)ی عێراق، شایستە داراییەكانی هەرێمی كوردستان بنێێرێت.
ناردنی شایستە داراییەكانی هەرێم مافێكی دەستوری خەڵكی هەرێمی كوردستانە بەرهەمی كاری هاوبەشی تیمی حكومەتە.
هیوادارین حكومەت و دیوانی چاودێری دارایی هەرێمی كوردستان داتاو زانیاری و وردەكاریەكانی داهاتە نانەوتییەكان لەگەڵ دیوانی چاودێری دارایی عێراق بە خێرایی وردبینی بكات وئەركەكانی خۆی لە بەرامبەردا بۆ بەدەستهێنانی شایستە داراییەكان جێبەجێ بکات.
- ئەم هەنگاوە هاندەر بێت بۆ چاكسازی گشتی كە لە بەرنامەی كابینەی نۆیەمی حكومەتی هەرێمی كوردستان دیاریكراوە.
- دەبێت حكومەت نەخشەیەكی هەبێت بۆ كۆتایی پێهنان و قەرەبوكردنەوەی لێبڕین و پێدانەوەی پاشەكەوتی موچە بە موچە خۆران.
- جەخت دەكەینەوە لە ڕوانگەی نیشتیمانیمان بۆ سەرجەم كێشەكانی هەرێمی كوردستان و چارەسەركردنیان و بە دەستهێنانی دەستەكەوتەكان.
- پێداگری دەكەین لە شایستە داراییەكان و پاراستنی خاكی هەرێمی كوردستان و هاوبەشی راستەقینە بۆ مافە دەستوریەكانی خەڵكی كوردستان لەگەڵ حكومەتی عێراق.
فراكسیۆنی گۆڕان
2021/6/16