دەروازەی نێودەوڵەتی حاجی ئۆمەران ڕایدەگەیەنێت" ئەو هاوڵاتییانەی دەیانەوێت لە رێگای دەروازەکەوە گەشتی ئێران بکەن دەبێت بڕوانامەی پشکنینی ڤایرۆسی کۆرۆنایان پێبێت".
راگەیاندن و پەیوەندییەكانی دەروازەی نێودەوڵەتی حاجی ئۆمەران لە ڕاگەیەندراوێکدا ئاگاداری هاووڵاتیان و گەشتیارانی هەرێمی كوردستان دەكاتەوە، ئەوانەی كە بە نیازن لەڕێگەی دەروازەی نێودەوڵەتی حاجی ئۆمەرانەوە گەشت و سەردانی كۆماری ئیسلامی ئێران بكەن، لە ڕۆژی چوارشەممەوە ڕێكەوتی (١١/٨/٢٠٢١ ) پێویستە بڕوانامەی پشكنینی كۆرۆنا ئەنجامی نێگەتیڤ ( PCR ) لە یەكێك لە تاقیگەكانی باوەڕپێكراوی وەزارەتی تەندروستی حكومەتی هەرێمی كوردستان لەگەڵیاندابێت.
ڕوونیشیکردەوە، هەر هاووڵاتییەك یان گەشتیارێك بڕوانامەی پشكنینی كۆرۆنای لەگەڵدا نەبێت لەلایەن سەركۆنسولگەری كۆماری ئیسلامی ئێران لە هەولێر ڤیزا پێیان نادرێت و دەوڵەتی ئێران ڕێگایان پێنادات سەردانی ئێران بكەن و دەگەڕێنرێنەوە.
ئاماژەی بەوەشداوە، تا هاووڵاتیانی خۆشەویست تووشی گرفت و زەحمەتی ڕێگا نەبن، داوا لە هەموو گەشتیارە بەڕێزەكان دەكەین بە بێ هەبوونی بڕوانامەی پشكنینی كۆرۆنا بە مەبەستی چوون بۆ وڵاتی ئێران سەردانی دەروازەی نێودەوڵەتی حاجی ئۆمەران نەكەن چونكە ڕێگایان پێنادرێت.