وەزارەتی نەوتی عێراق بڕی هەناردە و داهاتی نەوتی بۆ مانگی ڕابردوو ئاشكراكرد و ڕایگەیاند" داهاتى نەوتى هەناردەکراو زیاتر لە ١١ ملیار دۆلار بووە".
وەزارەتی نەوتی عێراق لە ڕاگەیەندراوێکدا ئاماژەی بەوەکردووە، بەپێی ئامارە سەرەتاییەكان لەمانگی رابردوودا بڕی ١٠١ ملیۆن و ١٩١ هەزار و ٢٣٦ بەرمیل نەوت لە كێڵگە نەوتییەكان هەناردەكراوە.
سەبارەت بە داهاتى ئەو بڕە نەوتەش، وەزارەتى نەوتى عێراق روونیکردۆتەوە، تێکڕاى نرخى نەوت لە مانگى حوزەیراندا (١١٣ دۆلار و ٧٠ سەنت) بووە، بەوپێیەش داهاتى نەوت لەو مانگەدا ١١ ملیار و ٥٠٥ ملیۆن دۆلار بووە، کە ئەمەش زۆرترین داهاتی نەوتی بووە لە مێژووی عێراقدا.
ئاماژەی بەوەشداوە" ئەو نەوتەی مانگی رابردوو هەناردەكراوە ٩٧ ملیۆن و ٩٨٠ هەزار و ٥٨٩ بەرمیلى لە کێڵگە نەوتییەکانى ناوەڕاست و باشورى عێراق بووە و دوو ملیۆن و ٩١٠ هەزار و ٨٨٧ بەرمیلیشى لە کەرکوکەوە بۆ بەندەرى جەیهان بووە، تێکڕاى هەناردەى ڕۆژانەش سێ ملیۆن و ٣٧٣ هەزار بەرمیل بووە لە ڕۆژێکدا".