حکومەتی هەرێم بری هەناردە و داهاتی نەوتی لەسەرەتای ئەمساڵ بڵاوکردەوە و دەڵێت" بە بەهای زیاتر لە سێ ملیار نەوتمان فرۆشتووە".
فەرمانگەی میدیا و زانیاری سەر بە حكومەتی هەرێمی کوردستان ئێوارەی ئەمڕۆ لە راگەیەندراوێكدا بڵاویکردەوە" لەسەرەتای ئەمساڵ بڕی ٣٤ ملیۆن و ٩٢٣ هەزار و ١٦٨ بەرمیل نەوتمان لە ڕێی بۆریەوە و هەر بەرمیلێک نەوت بە ٨٦ دۆلار و ٧٣ سەنت فرۆشتووە".
ئەوەشی خستەڕوو، لەو ماوەیەدا و لە ناوخۆدا ٤٠٩ هەزار و ٣٧ بەرمیلیان بە نرخی ٨٤ دۆلار و ٢٣ سەنت فرۆشراوە و کۆی بڕی فرۆشراوی نەوت لەو ماوەیەدا سێ ملیار و ٦٣ ملیۆن و ٣٥٦ هەزار و ٨٩١ دۆلار بووە.
بەپێی ڕاگەیەندراوەکە، پاری ماوە بۆ مووچە دوای دەرکردنی سەرجەم خەرجیەکانی نەوت بڕی یەک ملیار و ٣٤٣ ملیۆن و ٨٤١ ملیۆن و ٢٣٢ دۆلار بووە.