ئەدهەم بارزانی، سەركردەی پێشووی پارتی دیموكراتی كوردستان داوا دەكات بەزووترین كات بەرپرسی پاسەوانەكانی ئازاد بكرێت.
ئەدهەم بارزانی، ئەندامی پێشووی سەركردایەتی پارتی دیموكراتی كوردستان و ئامۆزای مەسعود بارزانی، سەرۆكی پارتی لە فەیسبووكی خۆی نووسیویەتی، وەك ماوەیەك پێش ئێستا ڕای گشتییان ئاگادار كردەوە كە برا و هاورێی سی ساڵەی و بەرپرسی پاسەوانەكانی، فەرید عەبدولعەزیز بازی كە بۆ ماوی ١٣٥ رۆژ لە زیندانەكانی دەسەڵاتی هەولێردایە تەنها و تەنها تاوانی ئەوەیە كە دۆستی ئەونە و هەرچەند رۆژ جارێك لەلایەن (د) ناوێك ئاگادار دەكرێتەوەكە ئەگەر واز لەو پەیوەندیانەی لەگەڵ ئەدهەم بارزانی بێنێت، هەر ئێستا ئازاد دەكرێت و پلە و پۆستیشت پێ دەبەخشین.
ئەدهەم بارزانی ئاماژەی بەوەكردووە "ئێمە هیچ دوژمنایەتی و كێشەی شەخسیمان لەگەڵ هیچ كەس و لایەنێكدا نەبووە و نییە تەنها و تەنها خاوەنی هەڵوێستە تایبەتی و نیشتیمانپەروەریەكانی خۆم دەبم و بووم".
هەروەها وتویەتی "ئەمە لەكاتێكدایە كە لەپێناو هەڵوێستەكانم ماوەی ٢٩٤ رۆژە گەڕانەوەی من بۆ زێدی باوباپیرانم و خاكی نیشتمان و ناو هاوڵاتیانی خۆم و ماڵ و مناڵەكانم لێ قەدەغە كراوە، ئای ئەمەیە دەسەڵاتداری و ئازادی و دیموكراسی و رێزگرتن لە مافی نیشتەجێبوونی هەر مروڤێك كە بەپێی دەستور بۆ هەموو هاوڵاتیانی دەستەبەر كردووە".
ئەدهەم بارزانی دەڵێت "داوای ئازادی بێ مەرجی بەپەلە بۆ فەرماندە فەرید عەبدولعەزیز بازی و سەرجەم بەناحەق زیندانیكراوان دەخوازم و رێز گرتن لە كەرامەت و شكۆی هەموو چین و توێژ و بیرو باوەڕە جیاوازەكان و نەتەوە و ئاینزاكان دەكەم".