مەکتەبی سیاسی یەکێتیی نیشتمانیی کوردستان پەیامێکی پیرۆزبایی ئاڕاستەی کۆمەڵانی خەڵکی کوردستان و دەنگدەرانی کوردستانی لە کەرکوک و سەرجەم ناوچە کوردستانییە دابڕێندراوەکان دەکات و دەڵێت " ئەم سەرکەوتنە جێی شانازییە و باشترین بەڵگە و بەرپەرچی کوردانەیە بۆ سەلماندنی ناسنامەی کوردستانی".
دەقی پەیامەکەی مەکتەبی سیاسی....
كۆمەڵانی خەڵكی كوردستان
دەنگدەرانی کوردستانی لە کەرکوک و سەرجەم ناوچە كوردستانییە دابڕاوەکان
بۆ ئەم سەركەوتنە مەزنەی گەلەکەمان و بەشداری پڕ جۆش و خرۆشتان، بەرۆحی بەرزی دیموکراتی و نیشتمانپەرەوەی بۆ سەرخستنی لیست و هاوپەیمانیی و كاندیدەكانی یەكێتیی نیشتمانیی كوردستان لە کەرکوک ، موسڵ ، خانەقین و خورماتوو، پیرۆزبایی خۆمان ئاراستەی دەنگدارانی بەوەفای کوردستانی و بەتایبەتی دەنگدەرانی سەوز دەکەین ، ئەم ئەنجامە جێی شانازییە باشترین بەڵگە و بەرپەرچی کوردانەیە بۆ سەلماندنی ناسنامەی کوردستانی و دووپات کردنەوەی ئەو راستییەی كە یەكێتیی هێزی جەماوەری كوردستانە و لەهەموو قۆناغەكان لەگەڵیاندایە و بەجێیان ناهێلێت، بە سیاسەت و خەبات ، بەسەنگ و دەنگ شەری كوردستانی سەرجەم ناوچە دابڕاوەکان دەكات.
پیرۆزە ئەم سەرکەوتنە کە یەكێتیەكەی خۆتان هێزی یەكەمی ناوچە دابڕاوەکانە بە تایبەتی لە كەركوكی قودسی کوردستان .
هەر پشت بە هێز و ئیرادەی ئێوەش و بە سیاسەتی چەپکە گوڵەکەی سەرۆک مام جەلال ئەنجومەنێکی کارای پارێزگا و ئیدارەیەکی خزمەتگوزار لە پێکهاتەکانی کەرکوک دروست دەکەین کە پارێزگارەکەی کورد و یەکێتیی بێت.
جارێکی تر پیرۆزە و هەر سەربەرز و سەركەوتوو بن