داواکاری گشتی هەرێم داوای یاسایی دژی موفتی عەرەبی سونە، رافع ئەلرفاعی جووڵاند کە لە بەرنامەیەکی تەلەفزیۆنیدا وەسفی داعشی کرد.
بەپێی نوسراوێک کە کۆپیەکی دەست سپی کەوتووە و رۆژی ٦/٢٦ دەرچووە، سەرۆکی داواکاری گشتی بەوەکالەت، جەواد فەتاح ئاغا نووسراوێکی فەرمی بۆ فەرمانگەی داواکاری گشتی هەولێر بەناونیشانی بزواندی سکاڵا ناردووەو، داوا لەو فەرمانەگەیە دەکات رێکارە یاساییەکان دژی موفتی " رافع ئەلرفاعی " بجوڵێنن.
بەپێی نوسراوە فەرمییەکە سەرۆکی داواکاری گشتی داوای بزواندنی ئەو سکاڵایە دەکات لەبەرئەوەی رافع ئەلرافعی لەبەرنامەیەکی تەلەفزیۆنی کەناڵی ئەلحەدەسی عەرەبییەدا، باسی باشی و دادپەروەری داعش دەکات.
لە نووسراوەکەدا ئەوە بیری داواکاری گشتی هەولێر هێنراوەتەوە، لە کاتێکدا ئەم موفتیە وەسفی داعش دەکات، پێشمەرگە لە جەنگی لەگەڵ ئەم رێکخراوەدا ١٤٠٠ شەهید و ٨٠٠ برینداری هەیە.
رافع ئەلرفاعی هاوڕێی جێگری سەرۆک کۆماری پێشووی هەڵهاتووی عێراق، تاریق هاشمییەو لەسەردەمی بەرهەم ساڵح کە سەرۆک وەزیران بوو لە ٢٠١٤دا هاتۆتە سلێمانی و دواتر لە هەولێر نیشتەجێ بووە، ناوبراو لەلایەن دادگای بەغداوە بڕیاری دەستگیکردنی هەیە.