جێگرانى سکرتێرى یەکێتى نیشتیمانى کوردستان لە پەیامێکدا ڕاگەیاند "ناوەندی بریاڕی یەکێتیمان ڕاگەیاند بۆ دياريكردنى نەخشەڕێگایەک بۆ چارەسەرکردنی کێشەکانی خەڵک و قەیرانەکانی یەکێتی".

لە میانی پەیامێکدا کە بەبۆنەی جەژنەوە بڵاویانکردووەتەوە کۆسرەت ڕەسوڵ و بەرهەم ساڵح جەختەکەنەوە لەسەر جێبەجێکردنی پەیامی ناوەندی بڕیار و هەر لەو ڕاگەیەندراوەدا هاتووە "هیوادارین بەهیمەتی هەمووان بتوانین ئەم جەژنە بکەینە سەرەتایەکی ڕاستەقینە بۆ ئاشتەوایی و یەکڕیزی خەڵکى کوردستان و بیکەین بەدەسپێکێکی جدی بۆ چارەی قەیرانی کەڵەکەبوی حوکمڕانیمان و دابینکردنى مووچە و قوت و خزمەتگوزاری شایستە بەخەڵک".

لەو ڕاگەیەندراوەدا ڕاشیانگەیاندووە "ئێمە لەناوەندی بڕیاڕی یەکێتی پشت بەخوا و بەگەلی کوردستان و پشت بەیەکێتیە تێکۆشەرەکان بەڵێن دەدەین سوربین لەسەر خواست و ماف و داواکاریە ڕەواکانتان و شێلگیرانە تێدەکۆشین لەپێناو خواستە گەورەکانی خەڵک و ئەو بەهاو ئامانجە بەرزانەی یەکێتییان لەپێناودا دامەزراوە".