جێگری سەرۆكی ئەنجومەنی وەزیران ڕایگەیاند ، ساڵی
٢٠١٧ گۆڕانكاری ڕوو دەدات و ڕەوشەكە بەرەو باشتر دەڕوات و ئێستا بەسوود وەرگرتن لە ئەزموونەكان و هاوكاری
هەموو لایەك پێداچوونەوە دەكەین بە سیستەمی پاشەکەوتی موچەدا لە بەرژەوەندی مووچەخۆران.
قوباد تاڵەبانی، جێگری سەرۆكی ئەنجومەنی وەزیران،
لە لێدوانێكی ڕۆژنامەوانیدا ڕایگەیاند، هەنگاوێكی گرنگی حكومەتی هەرێم بەڕووی چاكسازیی
و شەفافییەتی زیاتر لە داهاتەكانی گومرگ، بە ئەلكترۆنیكردنی دەروازەكانە و بەستنەوەیان
بەیەكەوە لەڕێی سیستەمێكی ئەلكترۆنیدا.
قوباد تاڵەبانی ڕاشیگەیاندووە "سیستمی بەئەلكترۆنی
كردنی سیستەمی كاری گومرگەكان گرنگە بۆ زیادكردنی داهات و كەمكردنەوەی ڕۆتینات لە خاڵە
سنوورییەكان و جموجوڵی بازرگانیش زیندوتر دەكات".<br />
ڕاشیگەیاندووە چاكسازیەكانی حكومەت تەنها لە كەرتی
گومرگ نین و هەموو سێكتەرەكانی تر دەگرێتەوە و دەڵێت" پێداچوونەوەمان كردووە بە
سیستەمی گباج و میكانیزمی كۆكردنەوەی باج و چۆنیەتی بەكارهێنانی وەك بوودجەیەكی حكومەت.
هەروەها بە ئەلكترۆنی كردنی كەرتی دارایی و كاڕگێڕی، كاریگەری زۆری دەبێت لەسەر خزمەتكردنی
هاوڵاتیان و كۆكردنەوەی داهات و خەجكردنی بەشێوەیەكی شەفافتر
هەروەها دەڵێت " زیاتر لە ٧٠٠ هەزار مووچەخۆر
خۆیان تۆمار كردووە لەو سیستەمە و پێویستە هەموو مووچەخۆران خۆیان تۆمار بكەن، چونكە
دوای كۆتایی هێنانی وادەی پڕۆسەكە، مووچە نادرێت بەو كەسانەی، كە خۆیان تۆمار نەكردووە".
وتیشی " دەبێت قەبارەی حكومەت بچووك بكەینەوە
و ئەو سەردەمەش تێپەڕی، كە بە ئیمزایەك ٢٥ هەزار كەس لە حكومەت دابمەزرێت"
قوباد تاڵەبانی وتوشییەتی " ساڵی ٢٠١٧ مان
ناو ناوە (ساڵی رێكخستنەوە)، دەبێت هەموو كارەكانی حكومەت ڕێكتر بخرێنەوە و دواتر دەیسەلمێنین،
بە كردەوە، كە ئێمە خزمەتكاری هاوڵاتیانین و گەشبینیشین بەوەی ساڵی ٢٠١٧ گۆڕانكاری
ڕوو دەدات و ڕەوشەكە بەرەو باشتر دەڕوات".
سەبارەت بە پێداچونەوە بە سیستەمی پاشەكەوتی مووچە
وتی "پار ساڵ بڕیاری پاشەكەوت كردنی بەشێك لە مووچە درا، كە بە ویستی كەس نەبوو
و كەسیشمان ڕازی نەبووین، بەڵام حكومەت ناچار بوو، بڕیاری ئەوەشماندابوو، كە ڕەوشی
دارایی باش ببێت پێداچوونەوە دەكەین بەو سیستەمە، ئێستا بەسوود وەرگرتن لە ئەزموونەكان
و هاوكاری هەموو لایەك پێداچوونەوە دەكەین بەو سیستەمە لە بەرژەوەندی مووچەخۆران".
دڵنیاییش بە فەرمانبەران دەدات كە پارەی پاشەكەوت
كراوی مووچەكانیان نافەوتێت و میكانیزمی تایبەتیشمان هەیە بۆ ئەو مەبەستە.