کاوە محەمەد، پەرلەمانتاری گۆڕان لە ئەنجومەنی نوێنەرانی عێراق ڕوونکردنەوەیەکی بڵاوکردەوە و هەواڵێکی سایتی باسنیوز ڕەت دەکاتەوە و ڕایدەگەیەنێت "من دەمێکە بایکۆتی سایتی (باسنیوز)م کردووە".
لە ڕوونکردنەوەکەدا هاتووە "سایتی باسنیوز هەواڵێکی پڕ لەدرۆیان بڵاوکردۆتەوە کە گوایە لەدوای گۆڕانکاریی لەسەرۆکایەتی فراکسیۆنی گۆڕان لەپەرلەمانی عیراق، من نیگەران بووم و لەبزووتنەوەی گۆڕان دوورکەوتوومەتەوە، جگە لەرەتکردنەوەی سەرلەبەری ئەو چەواشەکارییە، بە هەموو لایەکی رادەگەیەنم و ئەدا و بۆچوونەکانیشم ئەوە دەسەلمێنن کە ئەوەی من بە بزووتنەوەی گۆڕان دەبەستێتەوە، بەرنامە و سیاسەتە راست و رەواکانیەتی".
دەقی ڕوونکردنەوەکە:
روونکردنەوەیەکی پێویست
من دەمێکە بایکۆتی سایتی (باسنیوز)م کردووە و بەراشکاویش پێم راگەیاندوون کە لەبەرئەوەی سایتێکی هەواڵگرییە و لانیکەمی ئیتیک و پیشەییبوونی تێدا رەچاو ناکرێت، بۆیە ئامادەنیم هیچ لێدوانێکتان بۆ بدەم..بەڵام سەرەڕای ئەوەش بەداخەوە بەرووقایمیەوە و بەپشت بەستن بە سەرچاوەیەکی هاوکوفی خۆیان، هەواڵێکی پڕ لەدرۆیان بڵاوکردۆتەوە کە گوایە لەدوای گۆڕانکاریی لەسەرۆکایەتی فراکسیۆنی گۆڕان لەپەرلەمانی عیراق، من نیگەران بووم و لەبزووتنەوەی گۆڕان دوورکەوتوومەتەوە..لێرەدا جگە لەرەتکردنەوەی سەرلەبەری ئەو چەواشەکارییە، بە هەموو لایەکی رادەگەیەنم و ئەدا و بۆچوونەکانیشم ئەوە دەسەلمێنن کە ئەوەی من بە بزووتنەوەی گۆڕان دەبەستێتەوە، بەرنامە و سیاسەتە راست و رەواکانیەتی و هەمیشەش لەبەرەی خەڵک و بەرژەوەندییەکانیان و دژ بە خۆسەپێن و گەندەڵکاران، درێژە بە خەبات دەدەم، جا با بەڕێوەبەرانی سایتی (باسنیوز) و ئەو سەرە گەورانەی لەپشتیانەوەن لەداخا یەخەی خۆیان دادڕن.
کاوە محەمەد
ئەندامی فراکسیۆنی گۆڕان
لەئەنجومەنی نوێنەرانی عیراق
۲٠۱۷/۷/۱۳