دەزگای ئاسایشی هەرێم لەبارەی ئەو گرووپە چەكدارەی كە وا باسدەكرێت داعش بن و شاخی بەمۆیان كۆنتڕۆڵ كردبێت ڕایدەگەیەنێت "ژمارەیەك چەك دەستی بەسەردا گیراوە و لە حەشارگەكایان لە چیای بەمۆ هەڵهاتوون".
لە ڕاگەیەندراوەكەی دەزگای ئاسایشی هەرێمدا هاتووە "بەهاوكاری پۆلیسی گەرمیان و هێزێكی بەرگری و فریاكەوتنی دەربەندیخان بەردەوامن لە كیوماڵكردنی ناوچەكەن و كۆنترۆڵكردنی سنورەكە".
دەقی ڕاگەیەندراوەكە:
دەزگای ئاسایشی ھەریم زانیاری گرنگ لەبارەی گروپە چەكدارەكەوە بڵاودەكاتەوە
لە سەر بنەمای زانیاری و بەدواداچونی ورد بۆ هێزەكانی بەڕێوەبەرایەتی ئاسایشی گەرمیان رونبووە لەسەر بونی ژمارەیەك چەكداری نەناسراو لە بناری بەمۆ.پاش لێكۆڵینەوە و وەرگرتنی رەزامەندی دادوەر بە فەرمانی سەرۆكی دەزگای ئاسایشی هەرێم ، ئێوارەی رۆژی 22 / 1 /2018 ئاسایشی گەرمیان ، بنكەكانی ئاسایشی بەمۆ و مەیدان و دەربەندیخان ئۆپراسیۆنی كیوماڵكردنی ناوچەكەیان دەسپێكرد و توانیان شوێن و حەشارگەی چەكدارە نەناسراوەكان ئاشكرا بكەن، رووبەڕوی ژمارەیەك چەكداری نەناسراو بونەوە دوای ئەوەی داوایان لێكرا ناسنامەیان ئاشكرا بكەن و خۆیان رادەستی هێزەكانمان بكەن
بەڵام دوای خۆدزینەوەیان روبەڕووی هێزەكانی ئاسایش بونەوەو شەڕوپێكدانان رویدا و هەڵهاتن. بەڵام بەهۆی سەختی ناوچەكە هێزەكانی ئاسایشی گەرمیان بەردەوام بوون و پلانی خۆیان گۆڕی و سەرەتا شاخی بەمۆ كۆنتڕۆڵكراو پاشان توانرا حەشارگەكەیان ئاشكرابكرێت و دەسبگیرێت بەسەر یەك چەكی (بیكەیسی )و (دوو كڵاشینكۆف )و یەك فەردە( تیئێنتی ) و 17 گولەی ( ئاربیچی ) و چەندین سندوقی فیشەك و مەوادی خۆراكی
بەپێی زانیاریەكانی دەزگای ئاسایشی هەرێم چەكدارەكان گومانی تیرۆرستانی داعشیان لێدەكرێت و پێشتر زانیاری ورد هەبووە لەسەر جموجۆڵەكانیان لە ناوچەی حەمرین و لە ئێستاشدا هێزەكانی بەرێوبەرایەتی ئاسایشی گەرمیان ، بەهاوكاری پۆلیسی گەرمیان و هێزێكی بەرگری و فریاكەوتنی دەربەندیخان بەردەوامن لە كیوماڵكردنی ناوچەكەن و كۆنترۆڵكردنی سنورەكەو كۆمەڵانی خەڵكیش دڵنیا دەكەینەوە كە شەو نوخون دەبین و بە گیانمان خاكی هەرێم دەپارێزین
دەزگای ئاسایشی هەرێمی كوردستان
23/1/2018